ԵՐԵՎԱՆ, 10 մարտի - Sputnik. ՀՀ նախագահ Արմեն Սարգսյանն ու վարչապետ Նիկոլ Փաշինյանը երկուսով իրենց «սև գործն» արեցին, հիմա էլ հանդիպումներ են խնդրում։ Լրագրողների հետ զրույցում նման կարծիք հայտնեց Հայրենիքի փրկության շարժման համակարգող Իշխան Սաղաթելյանը` անդրադառնալով ՀՀ նախագահ Արմեն Սարգսյանի տարածած հաղորդագրությանը։
Քիչ առաջ հայտնի դարձավ, որ ՀՀ նախագահը հանդիպման է հրավիրում վարչապետին, խորհրդարանական ուժերի ղեկավարներին և Հայրենիքի փրկության շարժման առաջնորդներին։
«Դեռ ընկերներիս հետ չենք քննարկել այս հարցը, ուստի բոլորի անունից հայտարարություն անել չեմ կարող։ Իմ անունից եմ ասում` ինձ մոտ տպավորություն է, որ իրենց սև գործն արել–վերջացրել են, հիմա քննարկումների են տանում»,–ասաց Սաղաթելյանը։
Նա նշեց նաև, որ քաղաքական հարցերում հանդիպումների առնչությամբ իրենք որևէ բարդույթ չունեն։ Սակայն հարցն այն է` ինչ օրակարգով է նախագահը հանդիպման հրավիրում։ Սաղաթելյանը նշեց` եթե վարչապետին Արմեն Սարգսյանը հրավիրել է քննարկելու նրա հեռանալու հարցը, խնդիր չկա, կգնան այդ հանդիպմանը։
«Սակայն եթե դա հերթական կապիկությունն է, մենք այդտեղ չկանք»,–ասաց Սաղաթելյանը` ևս մենք անգամ շեշտելով` դեռ իր ընկերների հետ կքննարկեն այդ հարցը։
Հիշեցնենք, որ Հայաստանում Նիկոլ Փաշինյանի հրաժարականի պահանջով բողոքի ակցիաներ են անցկացվում նոյեմբերի 9-ին եռակողմ հայտարարության ստորագրումից հետո։
Ներքաղաքական իրավիճակը սրվեց, երբ ՀՀ ԶՈւ գլխավոր շտաբը փետրվարի 25-ին պահանջեց ՀՀ վարչապետ Նիկոլ Փաշինյանի հրաժարականը` նշելով, որ քաղաքական ղեկավարությունը պետությունը տանում է դեպի վտանգավոր սահմանագիծ։ Դա տեղի ունեցավ այն բանից հետո, երբ վարչապետը պաշտոնից հեռացրեց ԳՇ պետի առաջին տեղակալ Տիրան Խաչատրյանին։
Ի պատասխան Նիկոլ Փաշինյանը հայտարարեց ռազմական հեղաշրջման փորձի մասին և քաղաքացիներին կոչ արեց հավաքվել Հանրապետության հրապարակում` հեղափոխությունը պաշտպանելու համար։
Նա հայտնեց նաև, ստորագրել է ԳՇ շտաբի պետ Օնիկ Գասպարյանին պաշտոնից հեռացնելու փաստաթուղթը, որը, սակայն, ՀՀ նախագահ Արմեն Սարգսյանը չստորագրեց և հետ ուղարկեց փետրվարի 27–ին։ Նույն օրը վարչապետը առաջարկությունը նորից ուղարկեց ՀՀ նախագահին։
Գլխավոր շտաբը մարտի 1-ին նոր հայտարարություն տարածեց` նշելով, որ կրկին հաստատում է ստեղծված իրավիճակի վերաբերյալ իր գնահատականները և շեշտում, որ, անկախ Զինված ուժերը քաղաքական գործընթացների մեջ ներքաշելու փորձերից, մնում Է անդրդվելի, կշռադատված և հաստատակամ։
Մարտի 2-ին հայտնի դարձավ, որ նախագահը չի ստորագրել Օնիկ Գասպարյանին ԳՇ պետի պաշտոնից ազատելու հրամանագիրը, բայց ՍԴ է դիմելու ոչ թե Նիկոլ Փաշինյանի ներկայացրած հրամանագրի նախագծի սահմանադրականության հարցը պարզելու համար, այլ «Զինվորական ծառայության և զինծառայողի կարգավիճակի մասին» 2017թ. նոյեմբերի 15-ի ՀՀ օրենքի՝ Սահմանադրությանը համապատասխանելու հարցը որոշելու խնդրանքով:
Այսօր կառավարությունը հրապարակեց ՀՀ վարչապետ Նիկոլ Փաշինյանի հայտարարությունը` նշելով, որ 2021թ. մարտի 10-ից Օնիկ Գասպարյանն իրավունքի ուժով համարվում է ազատված զբաղեցրած պաշտոնից։
Մինչ այդ ՀՀ նախագահի աշխատակազմը հայտնեց, որ Արմեն Սարգսյանը դիմում է ներկայացրել Սահմանադրական դատարան «Զինվորական ծառայության և զինծառայողի կարգավիճակի մասին» 2017թ. նոյեմբերի 15-ի օրենքի՝ Սահմանադրությանը համապատասխանելու հարցը որոշելու խնդրանքով:
