ԵՐԵՎԱՆ, 24 դեկտեմբերի – Sputnik. Եկեղեցին երբեք առանձին չի եղել իր զավակներից` ինչպես պատերազմի դաշտում, այնպես էլ առօրյայում։ Բաղրամյան պողոտայում անհետ կորած զինծառայողների հարազատների բողոքի ակցիայի ժամանակ ասաց Շենգավիթի Սրբոց Առաքելոց եկեղեցու քահանա տեր Զարեհ քահանա Աշուրյանը։
«Ես այստեղ եմ, քանի որ արդարությունը և ազգի միասնությունն է կարևոր այսօր։ Այս մարդիկ իրենց զավակների վերադարձն են ուզում, ինչն արդարացի պահանջ է։ Չպետք է անտարբեր լինել. եթե որևէ մեկի ընտանիքում չկա անհետ կորած, դա չի նշանակում, որ պետք է անտարբեր լինել»,–ասաց տեր Զարեհը։
Նա հայտնեց նաև, որ կիսում է Ամենայն Հայոց Կաթողիկոսի կարծիքը և կարծում, որ վարչապետ Նիկոլ Փաշինյանը պետք է հրաժարական տա։
Հարցին, թե ինչպե՞ս է վերաբերվում Սիսիանի եկեղեցու քահանայի պահվածքին, որը չսեղմեց եկեղեցում գտնվող վարչապետ Նիկոլ Փաշինյանի ձեռքը` տեր Զարեհը պատասխանեց` ինքն էլ համապատասխան արձագանք կտար։ «Եկեղեցին սեղմում է նրա ձեռքը, ով, իրոք, ներս է մտնում զղջումով և ապաշխարումով, այլ ոչ թե մոմերի առաջ լուսանկարվելու և փիար անելու համար»,–ասաց տեր Զարեհը։
Հիշեցնենք` ՀՀ վարչապետ Նիկոլ Փաշինյանն դեկտեմբերի 21-ին այցելել էր Սյունիք, շրջել Սիսիան քաղաքում, տեղի պանթեոնում հարգանքի տուրք մատուցել զոհվածների հիշատակին։ Այնուհետև մտել էր Սիսիանի Սուրբ Գրիգոր եկեղեցի (Սիսավանի վանք), մոմ վառել և մոտեցել քահանային` տեր Պարգև քահանա Զեյնալյանին։ Քահանան, սակայն, հրաժարվել էր սեղմել Փաշինյանի ձեռքը։
Հավելենք, որ այսօր առավոտյան բողոքի ակցաներ են տեղի ունեցել նաեւ ՀՀ կառավարության գլխավոր մասնաշենքի շրջակայքում։
Կան տուժածներ ու բերման ենթարկվածներ։
Ընդդիմությունը բողոքի ակցիան շարունակում է գլխավոր դատախազության շենքի մոտ
Հավելենք, որ Հայաստանում բողոքի ակցիաները՝ վարչապետի հրաժարականի պահանջով, սկսվել են նոյեմբերի 9-ին Արցախում հրադադար հաստատելու վերաբերյալ եռակողմ հայտարարության ստորագրումից հետո։
Ընդդիմադիր կուսակցությունների նախաձեռնությամբ ստեղծվել է Հայրենիքի փրկության շարժում, որը վարչապետի միասնական թեկնածու ունի` Հանրային խորհրդի նախկին նախագահ Վազգեն Մանուկյանը։
Դեկտեմբերի 22–ից ընդդիմադիրները նստացույց են հայտարարել ու գիշերում են Հանրապետության հրապարակում տեղադրված վրաններում։
