Եռակողմ հայտարարության ստորագրումից արդեն 34 օր է անցել, բայց ՀՀ-Ադրբեջան նորացված սահմանների հարցը ոչ միայն չի լուծվել, այլև օր օրի ավելի է խճճվում։
Կադաստրի պետական կոմիտեի նախկին նախագահ, ճարտարապետ-քաղաքաշինարար Սարհատ Պետրոսյանը Sputnik Արմենիայի հետ զրույցում կարծիք հայտնեց, որ այդ ժամանակահատվածում, ցանկության դեպքում, հնարավոր էր ինչ–որ խնդիրներ լուծել, առնվազն`վիճելի հատվածներն առանձնացնել։
«Եթե կառավարության սիրտն իրոք ցավեր, հենց հաջորդ օրը պետք է հավաքեր երկրի լավագույն մասնագետներին, ասեր` ժողովուրդ ջան, մենք ունենք այս վիճակը, ի՞նչ անենք,– ասաց Պետրոսյանը, – բնական է, որ սահմանազատման ժամանակ, օրինակ, ասում ես` լավ, այս արոտավայրը ինձ, այն մեկը կզիջեմ և այլն։ Սա շատ բարդ բանակցություն է, և օր առաջ պետք է սկսել այն»։
Ինչ վերաբերում է քարտեզներին ու դրանցում առկա տարբերություններին, Սարհատ Պետրոսյանն առաջարկում է գտնել խորհրդային վերջին պաշտոնական քարտեզն ու բանակցությունները կառուցել դրա շուրջ։
Ինչ կլինի, եթե հիմք ընդունվի Google–ը կամ GPS–ը. սահմանային բնակիչներն անորոշության մեջ են
«Սահմանը բնության մեջ դա քարտեզը չէ, դա այն ցիցն է, այն ցանկապատն է, որը գծում է սահմանը։ Գրիչի, ֆլոմաստերի, տպագրական սարքի գծած գծի հաստություսնը ևս կարող է մի քանի մետր տարբերություն տալ։ Բնության մեջ սահմանը սահմանային ենթակառուցվածքներն են»,–ասաց նա։
Բացի իշխանության քաղաքական կամքից, Սարհատ Պետրոսյանը կարևորում է նաև մասնագետների ներգրավումը բանակցային պրոցեսին։ Ըստ նրա, գործընթացին պետք է ներգրավված լինեն նաև դիվանագետներ, պաշտպանության ոլորտի ներկայացուցիչներ, գյուղատնտեսության ոլորտի ներկայացուցիչներ, որպեսզի կարողանան գնահատել տվյալ հողատարածքի կարևորությունը գյուղի զարգացման համար, ինչպես նաև բնապահպաններ ու մշակույթի մասնագետներ, քանի որ սահմանային տարածքներում առկա են ինչպես բնության հատուկ պահպանվող տարածքներ, այնպես էլ մշակութային հուշարձաններ։
«Հատկապես հարավային հատվածում մենք ունեն Շիկահողի արգելոցը, որի սահմանները ևս մենք հստակ չունենք, քանի որ այն ևս սահմանային վիճակում է»,– ասաց Պետրոսյանը։
Եթե մենք այսօր չենք հստակեցնում մեր սահմանն ու չենք կառուցում սահմանային ենթակառուցվածքներ, մենք անընդհատ ունենալու ենք նույն խնդիրներն ու լարվածությունը։
«Մեր հովիվները հայտնվելու են այնտեղ, ընկերներով գնալու են խորոված անելու, մոլորվելու են, մնալու են այնտեղ։ Եվ դա բերելու է նոր լարվածության, նոր զոհերի, նոր գերիների»,– ասաց Պետրոսյանը։
Հիշեցնենք` դեկտեմբերի 11-ին ՀՀ պաշտպանության նախարարությունը հայտնեց, որ Հայաստանի Հանրապետության պետական սահմանագոտու հարավային հատվածում ՀՀ զինված ուժերի ստորաբաժանումների զինծառայողներն ու պահեստազորայինները իրականացնում են նոր բնագծերի ձևավորման և սահմանների պահպանության համատեղ աշխատանքներ։
Խնածախցիների արոտավայրերն անցել են ադրբեջանցիների վերահսկողության տակ. տեսանյութ
Նոյեմբերի 27-ին ՀՀ վարչապետ Նիկոլ Փաշինյանը հայտնեց, որ Հայաստանն ու Ադրբեջանը սահմանազատում են իրականացնում Սոթքի խորհրդային սահմանների հիման վրա։ Գործընթացն անցկացվում է նոյեմբերի 9-ի համաձայնագրի շրջանակում։
Դեկտեմբերի 13-ին Անվտանգության խորհրդի արտահերթ նիստում ՀՀ վարչապետ Նիկոլ Փաշինյանը հայտնել էր, որ Հայաստանն առաջիկայում ստիպված կլինի որոշումներ կայացնել Կուբաթլուի և Զանգելանի շրջանների ու Սյունիքի մարզի սահմանների հետ կապված։ Վարչապետը չէր բացառել, որ այդ գործընթացի շուրջ առաջիկայում կարող է որոշակի լարվածություն առաջանալ։
