ԵՐԵՎԱՆ, 7 դեկտեմբերի - Sputnik. Նոյեմբերի 9-ին Մոսկվայում ստորագրված եռակողմ հայտարարությունը կապիտուլյացիայի ակտ չէ։ Այսօր ԱԺ–ում լրագրողների հետ զրույցում նման հայտարարություն արեց ԱԺ «Իմ քայլը» խմբակցության անդամ, Արտաքին հարաբերությունների մշտական հանձնաժողովի նախագահ Հովհաննես Իգիթյանը։
«Ով ընդունում է, որ այդ հայտարարությունը կապիտուլյացիա է, ուրեմն նաև համաձայն է միջազգային իրավունքի տեսակետից այն անօրինականություններին, որոնք տեղի են ունենում, օրինակ, մեր սահմաններում։ Կապիտուլյացիան նշանակում է, որ դու քո թշնամուն տալիս ես քո սահմանները, քո իմունիտետը։ Արդյո՞ք մենք համաձայն ենք տալու դա։ Իհարկե ոչ»,– ասաց նա։
Իգիթյանը նաև նշեց, որ համաձայն չէ անգամ, որ եռակողմ հայտարարությունը ԼՂ խնդրի լուծում է, և աշխատում է այն ուղղությամբ, որպեսզի այն չդառնա ԵԱՀԿ ՄԽ բանակցային կոնցեպտի մաս։
«Ես պնդում եմ, որ ԱԺ–ն պետք է հայտարարություն անի և իր անհամաձայնությունը հայտնի, որ այդ հայտարարությունը չդառնա ԼՂ–ի խնդրի լուծման կոնցեպտը։ Մենք պետք է փորձենք ընդդիմության հետ միասին, միտինգում ամենածայրահեղ ելույթն ունեցող մարդու հետ միասին այնպես անենք, որ այդ հայտարարությունն ընկալվի միայն ու միայն որպես պարտադրված զինադադարի պայման»,– ասաց Իգիթյանը։
Հայտարարության արդյունքում եղավ զինադադար, բայց դրան զուգահեռ իրականացվեց անարդարություն` Արցախի հայության հանդեպ։
Իգիթյանը հիշեցրեց, որ հայտարարության տեքստում արձանագրված է տեղահանվածների վերադարձ ու հարց բարձրացրեց` հադրութցիներին, շուշեցիներին դա չի՞ վերաբերում։
Իգիթյանի համոզմամբ` պատերազմական գործողությունների ժամանակ ստորագրված ցանկացած փաստաթուղթ չի կարող համարվել պայմանագիր։ Ըստ նրա` բանակցելու համար նախ պետք է, որ պատերազմը դադարի, հետո միայն սկսվեն բանակցությունները։
Երևանը հուսով է, որ Բաքուն չի փորձի խափանել գերիների փոխանակման գործընթացը. Այվազյան
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության մեջ մասնավորապես նշվում է, որ մինչև նոյեմբերի 15-ը Ադրբեջանին է վերադարձնում Քելբաջարը (ավելի ուշ այդ ժամկետը 10 օրով երկարաձգվեց-խմբ.), մինչև նոյեմբերի 20-ը՝ Աղդամի շրջանը, մինչև դեկտեմբերի 1-ը՝ Լաչինի շրջանը` թողնելով միջանցք 5 կմ լայնությամբ, որը ապահովելու է Հայաստանի կապը, սակայն չի շոշափելու Շուշին։
Հայաստանն ապահովում է տրանսպորտային կապ Ադրբեջանի արևմտյան շրջանների և Նախիջևանի Ինքնավար Հանրապետության միջև։
Շփման գծի երկայնքով Լեռնային Ղարաբաղում և Լաչինի միջանցքում հաստատվում են ռուսական խաղաղապահ ուժեր 1960 զինվորականի չափով, հրազենային զենքով, 90 զրահատրանսպորտային և 380 ավտոմեքենաներով և հատուկ տեխնիկայով։
Ինչ տվեց Արցախի վերաբերյալ եռակողմ հայտարարությունը․ քարտեզ
Խաղաղապահները մնում են հինգ տարի ժամանակով` ավտոմատ երկարացման հնարավորությամբ, եթե հաջորդ հինգ տարվա համար կողմերը ժամկետի լրանալուց վեց ամիս առաջ չեն հայտարարում այս դրույթի կիրառությունը դադարեցնելու մասին։
Նշվում է նաև, որ ներքին տեղահանվածները և փախստականները վերադառնում են ԼՂ և հարակից շրջաններ, իրականացվում է ռազմագերիների փոխանակություն և մյուս պահվող անձանց փոխանակություն, ապաարգելափակվում են բոլոր տնտեսական և տրանսպորտային կապերը տարածաշրջանում։
