ԵՐԵՎԱՆ, 3 դեկտեմբերի - Sputnik. Նախօրեին մահկանացուն կնքած ԽՍՀՄ վաստակավոր օդաչու Դմիտրի Աթբաշյանը երազում էր տեսնել Ստեփանակերտի օդանավակայանի վերաբացումը։ Sputnik Արմենիայի հետ զրույցում այս մասին ասաց նրա գործընկերը` քաղաքացիական ավիացիայի վետերան, Ռուսաստանի վաստակավոր օդաչու Վլադիմիր Տոլյուպան, որը տարիներ շարունակ Երևանում է աշխատել։
«Նա ուզում էր Լեռնային Ղարաբաղում փոքր ավիացիա բարձրացնել։ Բայց ոչինչ չստացվեց․․․», - ասում է Տոյուպան։
2010 թվականի հուլիսից 2015 թվականի հուլիսը Աթբաշյանը զբաղեցրել է Արցախի քաղաքացիական ավիացիայի վարչության պետի պաշտոնը, եղել է Արցախի վարչապետի խորհրդական։
2016 թվականին Ստեփանակերտի օդանավակայանը պատրաստվել էր շահագործման ու մի քանի օրվա ընթացքում կարող էր գործարկվել։ Այն այդպես էլ չբացվեց, քանի որ ադրբեջանական կողմը սպառնում էր խոցել այնտեղ ժամանող ինքնաթիռները։
Վլադիմիր Տոլյուպան ասում է, որ Աթբաշյանի վախճանը մեծ հարված է հայկական ավիացիայի համար։
«Նա շատ բան արել։ Նրա ջանքերով երկարացվել է թռիչքուղին, այդքան օդանավակայան է կառուցվել։ Ցավոք, այս սերունդն այդ ամենը վերացրեց», - ասում է Տոլյուպան։
Հիշեցնենք՝ Դմիտրի Աթբաշյանը մեկն էր այն մարդկանցից, որոնք նախաձեռնեցին Լենինականի (այժմ՝ Գյումրի) «Շիրակ» օդանավակայանի կառուցումը:
Լենինականի օդանավակայանը կառուցելիս Աթբաշյանը ջանք ու եռանդ չի խնայել՝ հետևելու շինարարական աշխատանքներին, որ ոչինչ թերի չլինի, կառուցվի բոլոր չափանիշներին համապատասխան:
Հենց դրա շնորհիվ էր, որ 1988–ի երկրաշարժի ժամանակ Լենինականում շատ շենք ու շինություններ քանդվեցին, իսկ օդանավակայանը մնաց կանգուն:
Մահացել է Քաղաքացիական ավիացիայի գլխավոր վարչության նախկին պետ Դմիտրի Աթբաշյանը
Աթբաշյանը վստահ էր, որ եթե Հայաստանն ուզում է դուրս գալ տնտեսական կոլապսից, ապա առաջին հերթին պետք է ավիացիան խթանել, որովհետև առանց դրա հզորանալն անհնար է։
Աթբաշյանը մահացել է Երևանում 82 տարեկանում: Sputnik Արմենիայի տվյալներով՝ նա երկար ժամանակ պայքարել է ուռուցքային հիվանդության դեմ։
