ԵՐԵՎԱՆ, 29 հոկտեմբերի – Sputnik. Լեռնային Ղարաբաղում խաղաղապահ մեխանիզմը կարող է ներառել միայն նրանց, ովքեր չեզոք դիրք են զբաղեցնում։ Այս մասին ՌԻԱ Նովոստիին ասել է ՀՀ ԱԳ նախարար Զոհրաբ Մնացականյանը։
«Ինչ կարելի է ընդգծել հենց սկզբից. ցանկացած խաղաղապահ մեխանիզմ չի կարող ներառել նրանց, ովքեր խոսքով և գործով ոչ թե չեզոք են, այլ հանդես են գալիս որպես հակամարտության կողմ»,-ասել է Մնացականյանը:
Նրա խոսքով՝ խաղաղության պահպանման գործողությունը միշտ էլ եղել է հիմնարար սկզբունքների և, հետևաբար, հակամարտությունների կարգավորման կարևոր բաղադրիչ:
«Այս փուլում դժվար է առաջարկել խաղաղապահ գործողությունների հետ կապված պահանջների սպառիչ ցանկը»,-նշել է նա՝ պատասխանելով այն հարցին, թե պատրա՞ստ է արդյոք Հայաստանը քննարկել Լեռնային Ղարաբաղում խաղաղապահների տեղակայման հարցը և ինչ պայմաններով:
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 28-ի ժամը 13։00-ի դրությամբ` հակառակորդի կրակոցների հետևանքով Արցախում զոհվել են 1119 զինծառայողներ և 39 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6749 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 25 ինքնաթիռ, 16 ուղղաթիռ, 226 անօդաչու սարք, 6 ՏՈՍ-1 «Սոլնցեպեկ» համազարկային կրակի ռեակտիվ համակարգ, 632 տանկ և ՀՄՄ:
Ես չգնամ, էլ ո՞վ գնա. Արցախից եկած մարզիկն ու մարզիչը պատմում են տղաների հերոսության մասին
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
Անմարդկային են կռվում․ հադրութցի Մարո բաբոն սպասում է հաղթանակին ու «հնդկական» երեկոներին
