ԵՐԵՎԱՆ, 11 հոկտեմբերի- Sputnik. Ազգերի լիգայի մրցաշարի խմբային փուլում Հայաստանի հավաքականը երրորդ խաղում մրցեց Վրաստանի ընտրանու հետ։ Խաղն ավարտվեց ոչ ոքի` 2։2 հաշվով։
Կասկածից վեր, է որ մեր հավաքականի ֆուտբոլիստների համար շատ դժվար խաղ էր։ Հայաստանում ու Արցախում տիրող վիճակը չէր կարող չազդել մեր ֆուտբոլիստների հոգեբանության վրա։ Բայց հարկավոր էր խաղալ, պայքարել ու ամեն ինչ անել հաղթանակի համար։
Խաղը մեր թիմի համար շատ լավ սկսվեց։ Արդեն 6-րդ րոպեին Արման Հովհաննիսյանը ճիշտ փոխանցումով առաջ մղեց Տիգրան Բարսեղյանին, որն իր հերթին հարձակման ձախ եզրում շրջանցելով պաշտպանին փոխանցում կատարեց, որտեղ էլ Խորեն Բայրամյանն ընդունելով գնդակը, արագ կողմոնորոշվեց ու բացեց խաղի հաշիվը։ Բաց թողած գոլից հետո վրացիները չընկրկեցին ու մի քանի վտանգավոր պահեր ստեղծեցին մեր դարպասի մոտ, իսկ Դավիթ Յուրչենկոն ցույց տվեց իր վարպետությունը։
Մինչև ընդմիջում գնդակին ավելի շատ տիրում էին վրացի ֆուտբոլիստները։ Երբեմն մեր թիմը ստիպված էր լինում սեղմվել դեպի իր դարպասը, բայց գրոհելու հնարավորություն ստանալուն պես մերոնք նաև սպառնում էին։
Ամենաերիտասարդ ավագը, ռեկորդակիրը, ամենաթանկ տրանսֆերը. էլ ինչ նվաճումներ ունի Մխիթարյանը
Նվազագույն առավելությունը առաջին կեսում մեր ընտրանուն հաջողվեց։ Բայց երկրորդ կեսի հենց մեկնարկին վրացիները հավասարեցրին հաշիվը։ Ճիշտ է` բաց թողած գոլից անմիջապես հետո Ալեքսանդր Կարապետյանը կարող էր նորից առաջ մղել մեր թիմին, բայց մեր հարձակվողի հարվածից հետո գնդակը մի փոքր շեղությամբ դուրս եկավ դաշտի սահմաններից։ Իսկ խաղի ավարտից 16 րոպե առաջ մերոնց ձախողումը պաշտպանությունում մրցակիցը օգտագործեց շատ վստահ, ու փոխարինման դուրս եկած Թոռնիկե Օկրիաշվիլին առաջ մղեց Վրաստանի հավաքականին։
Բայց հիմնական ժամանակի 89-րդ րոպեին Հենրիխ Մխիթարյանը, իրացնելով 11 մետրանոց հարվածը, վերջակետ դրեց այս մրցակցությանը՝ 2։2։
Մեր խմբում կայացած մյուս խաղում Էստոնիայի հավաքականը սեփական հարկի տակ խաղի ընթացքում հաղթում էր Հյուսիսային Մակեդոնիայի թիմին 3։1 հաշվով, բայց խաղավերջում երկու գնդակ բաց թողեց, ու այդ խաղն էլ ավարտեց ոչ-ոքի (3։3)։
Այսպիսով` խմբի աղյուսակում թիմերը տեղաշարժ չունեցան։ Հայաստանի հավաքականը առայժմ երրորդն է ու մեկ միավորով հետ է մնում Վրաստանի ու Հյուսիսային Մակեդոնիայի ընտրանիներից։
Էստոնիան վաստակեց առաջին միավորն ու հոկտեմբերի 14-ին ընդունելու է մեր թիմին։
Ֆանտաստիկ մեկնարկ, ցավոտ հիասթափություն. ինչու է 33–ամյա «ոսկե տղան» հեռանում խաղադաշտից
