ԵՐԵՎԱՆ, 19 օգոստոսի - Sputnik. ՀՀ Երրորդ նախագահ Սերժ Սարգսյանն այսօր մամուլի ասուլիս է հրավիրել պատասխանելու 2016թ-ի ապրիլյան պատերազմի մասին լրագրողներին ու հանրությանը հետաքրքրող հարցերին:
Մինչ ասուլիսը սկսելը Սերժ Սարգսյանն առաջարկեց մեկ րոպե լռությամբ հարգել ապրիլյան պատերազմի բոլոր զոհերի հիշատակը:
«Եվ առաջին հերթին՝ Ադամ Սահակյանի և Գևորգ Վարդանյանի: Այսօր նրանց ծննդյան օրն է»,- ասաց Երրորդ նախագահը:
Սերժ Սարգսյանն անդրադարձավ նաև Հայաստանում կորոնավիրուսի դեմ տարվող պայքարին՝ շնորհակալություն հայտնելով բոլոր նրանց, ովքեր իրենց կյանքը վտանգելով, կյանքեր են փրկում, հատկապես՝ բժիշկներին ու լրագրողներին:
Հիշեցնենք՝ ապրիլի 16-ին ՀՀ ԱԺ քննիչ հանձնաժողովի նիստից առաջ ՀՀ երրորդ նախագահը լրագրողներին խոստացել էր արտակարգ դրության ավարտից անմիջապես հետո հրավիրել մամուլի ասուլիս և առաջին հանդիպման ժամանակ պատասխանել ապրիլյան իրադարձությունների հետ կապված բոլոր հարցերին:
