ԵՐԵՎԱՆ, 27 հուլիսի – Sputnik. Վերին Դվինի ջրանցքն ընկած 14-ամյա տղայի` Անդրանիկ Ն.–ի դին փրկարարները քիչ առաջ դուրս են բերել ջրից: Sputnik Արմենիայի հետ զրույցում լուրը հայտնեց Վերին Դվինի համայնքի ղեկավար Լյուդմիլա Պետրովան։ Նա հայտնեց, որ դեպքից երեք ժամ անց` ժամը 19։45–ին, ջրից հանել են 14–ամյա տղայի դին։
Ինչպես արդեն տեղեկացրել էինք, ԱԻՆ–ը հայտնել էր, որ այսօր մի երեխա է Վերին Դվինի ջրանցքն ընկել։
«Ես խոսել եմ տղայի ընկերոջ հետ, որոնք երկուսով գնացել էին լողալու։ Մեզ մոտ բնակավայրից 50 մետր հեռավորության վրա ջրանցք կա։ Դրա վրա կամուրջ կա, և հենց այդ հատվածում էլ գնացել էին երկու ընկեր լողալու։ Դեպքը տեղի է ունեցել ցերեկը ժամը 16։17-ի սահմաններում։ Հարցն այն է, որ խեղդված տղան լողալ չի իմացել»,–ասաց տիկին Լյուդմիլան։
Նրա խոսքով` տղան փորձել է լողալ սովորել, ինչ–որ թել են կապել կամրջից, որից բռնվելով էլ մի փոքր լողացել է։ Սակայն հերթական փորձի ժամանակ նա սուզվել է ջրի հատակը, հետո կարողացել բարձրանալ ու ձեռքով ինչ–որ նշան տալ, օգնության կանչել ընկերոջը։ Ընկերն էլ խուճապահար վազել է այդ տղայի տուն` օգնության կանչելու։ Տունն այնքան էլ մոտ չի եղել` ջրանցքից 800 մետր հեռավորության վրա է գտնվել։
«Թարսի պես, ցերեկ է եղել, շոգ օր, ու գյուղացիները բոլորը տներում են եղել, և ճանապարհին տղան ոչ մեկին չի տեսել, որ ասի։ Հասել է ընկերոջ տուն, մորն է ասել, որ խեղդվել է տղան, ու անմիջապես ԱԻՆ են զանգել»,–պատմեց համայնքի ղեկավարը` հավելելով, որ իրեն տեղեկություններ հայտնած տղային փորձել է դրանից ավելի հարցուփորձ չանել` երեխան շատ վախեցած է եղել։
Մահացած տղան երեք քույր ունի, նրանք Վերին Դվին են տեղափոխվել 4 տարի առաջ` Ուկրաինայից։
