ԵՐԵՎԱՆ, 9 հուլիսի — Sputnik. Աշխարհում կորոնավիրուսի նոր դեպքերի թիվը երեկվա ընթացքում գերազանցել է 100 000-ը: Ընդհանուր դեպքերի թիվը գերազանցել է 12 մլն-ը: Այսօր կառավարության հերթական նիստն այս տվյալներով սկսեց ՀՀ վարչապետ Նիկոլ Փաշինյանը:
«Երկրներ, որոնք հայտարարել էին, որ հաղթահարել են կորոնավիրուսի համաճարակը, վերադառնում են կրկին համաճարակի ակտիվ փուլ: Երեկ ԱՀԿ-ն հայտարարեց, որ հաստատված է համարում, որ օդի միջոցով վարակը կարող է տարածվել: Սա, ըստ էության, այն է, ինչ մենք նախորդ շաբաթ, հիմնվելով գիտական նոր տվյալների վրա, հայտարարել էինք: Այս առումով է հատկապես կարևորվում դիմակների կրումը»,- ասաց Փաշինյանը:
Վարչապետն ընդգծեց, որ Հայաստանում ևս համաճարակը շարունակում է ծավալվել: Երեկ գրանցվել է վարակի նոր 526 դեպք:
Մահերի թիվը կորոնավիրուսից հասել է 535-ի, ևս 170 քաղաքացի մահացել է այլ պատճառներով, բայց վարակված է եղել կորոնավիրուսով:
«Ես ցանկանում եմ ընդգծել, որ հակահամաճարակային մեր ռազմավարությունը շարունակում է մնալ նույնը, այն է՝ սովորել ապրել այնպիսի կանոններով, որոնք մեզ թույլ կտան զրոյացնել նոր դեպքերի թիվը»,- ասաց Փաշինյանը:
Վարչապետը չբացառեց, որ կառավարությունը կգնա հակահամաճարակային միջոցառումների խստացման ճանապարհով: Բայց կառավարության նպատակը, նրա խոսքով, ոչ թե մարդկանց տուգանելն է, այլ որևէ կերպ մոտիվացնելը, որ դիմակ դնեն:
«Որովհետև ՀՀ քաղաքացին կորոնավիրուսից մահանալու մատերիալ չէ»,- ասաց նա:
Մենք հիմա քաղաքական հարցեր ենք քննարկում, իսկ մարդիկ մահանում են վարակից. ԱԺ նախագահ
Հիշեցնենք` հուլիսի 9-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 30 346 դեպք, որոնցից 18 000-ն առողջացած, 535-ը` մահվան ելքով: Կորոնավիրուսային հիվանդությամբ այս պահին փաստացի բուժում է ստանում 11 641 պացիենտ:
Ընդհանուր առմամբ կատարվել է 12 9166 թեստավորում:
Վերջին մեկ օրում ունենք կորոնավիրուսային հիվանդությամբ հաստատված 526 նոր դեպք և 573 առողջացած։
Կայուն, բայց ծանր. Թորոսյանը խոսեց Հայաստանում կորոնավիրուսային իրավիճակից
