ԵՐԵՎԱՆ, 25 հունիսի – Sputnik. Քննություն է տարվում՝ պարզելու կորոնավիրուսից մահացած անձանց տվյալները տարածելու դեպքի հանգամանքները։ Տեղեկությունը հայտնում է ՀՀ քննչական կոմիտեն։
Հունիսի 1-ին՝ ժամը 23:09-ին, Facebook սոցցանցի «Զնդան» անունով էջը հրապարակել էր «Ո՞վ է պատասխան տալու այս անմեղ զոհերի համար» հոդվածը, որին կցել էր կորոնավիրուսից մահացած 132 անձանց տվյալները։
«Դեպքի առթիվ հունիսի 3-ին ոստիկանությունում հարուցվել է քրեական գործ՝ ՀՀ քրեական օրենսգրքի 144-րդ հոդվածով (անձնական կամ ընտանեկան կյանքի մասին տեղեկություններ ապօրինի հավաքելը, պահելը, օգտագործելը կամ տարածելը)։ Գործի նախաքննությունը կատարելու համար այն ուղարկվել է ՀՀ քննչական կոմիտե։ Այն վարույթ է ընդունվել»,–նշված է հաղորդագրության մեջ։
ՔԿ–ն հայտնում է, որ Facebook.com–ի «Զնդան» անունով և «zndan711» նույնականացման տվյալով անհատական էջին հասանելիություն ստացած IP հասցեները պարզելու նպատակով բաժանորդային տվյալներ ստանալու թույլտվության միջնորդություն է ներկայացվել Երևան քաղաքի ընդհանուր իրավասության դատարան։ Դատարանը բավարարել է միջնորդությունը։
Միջոցներ են ձեռնարկվում՝ ենթադրյալ հանցագործություն կատարած անձի ինքնությունը պարզելու և նրան հայտնաբերելու ուղղությամբ:
Նախաքննությունը շարունակվում է:
