ԵՐԵՎԱՆ, 16 ապրիլի– Sputnik. ՀՀ երրորդ նախագահ Սերժ Սարգսյանը ժամանեց Ազգային ժողով։ «Հարգելի լրագրողներ, ուզում եմ, որ հավատացաք լինեք, որ ես ձեզնից ավելի շատ եմ շահագրգռված շփվելու լրատվամիջոցների հետ։ Պարզ պատճառով` ես ոչինչ չունեմ թաքցնելու։ Եկել է ժամանակը` պատրաստ եմ պատասխանել բոլոր հարցերին»,–ասաց նա լրագրողների հետ զրույցում։
Քիչ անց կմեկնարկի Ապրիլյան պատերազմի հանգամանքներն ուսումնասիորղ քննիչ հանձնաժողովի նիստը, որին էլ պետք է մասնակցի Սերժ Սարգսյանը։
Սարգսյանն հիշեցրեց, որ ինքը դիմել էր քննիչ հանձնաժողովին, որ իր մասնակցությամբ նիստը անցկացնեն արտակարգ դրության ավարտից հետո։ Սակայն նրանք նպատակահարմար համարեցին այն հիմա անցկացնել։
Ի պատասխան լրագրողների` իրեն ուղղված մի շարք հարցերին` երրորդ նախագահը նշեց, որ հիմա ոտքի վրա 1-2 պատասխաններով չի բավարարի ո՛չ լրագրողներին, ո՛չ հանրությանը։ Ուստի, Սարգսյանը խոստացավ արտակարգ դրության ավարտից հետո հրավիրել բոլոր լրատվամիջոցներին և միայն ապրիլյան իրադարձությունների հետ կապված զրույց ունենալ։ Նա նաև հավելեց, որ իր գրասենյակը շուտով հայտարարությամբ հանդես կգա այս ամենի վերաբերյալ։
Սերժ Սարգսյանն անակնկալի է բերել քննիչ հանձնաժողովին. «Ժողովուրդ»
Հիշեցնենք, որ Սերժ Սարգսյանը համաձայնել է մասնակցել նիստին մեկ պայմանով` ողջ ընթացքը պետք է տեսաձայնագրվի, և մեկ օրինակ տրամադրվի իրեն։
Քննիչ հանձնաժողովը պատասխանել էր Սերժ Սարգսյանին, սակայն երրորդ նախագահի գրասենյակը հայտարարել էր, որ իրենց համար այդպես էլ պարզ չէ` տրամադրելո՞ւ են տեսագրություն, թե ոչ։ Դրանից հետո քննիչ հանձնաժողովը համաձայնել էր բավարարել Սարգսյանի պահանջը, որից հետո երրորդ նախագահի գրասենյակը հայտարարությամբն հանդես եկավ` ասելով, որ Սարգսյանը կմասնակցի նիստին։
