ԵՐԵՎԱՆ, 12 ապրիլի — Sputnik. Այսօր Հայ առաքելական եկեղեցին տոնում է 5 տաղավար տոներից մեկը` Սուրբ Հարության տոնը (Զատիկ)։ Իհարկե, այս տարվա Զատիկը տարբերվում է մյուսներից, քանի որ առաջին անգամ այն եկեղեցիներում անցկացվում է առանց հավատացյալների։
Կորոնավիրուսի տարածումը կանխարգելելու նպատակով Հիսուս Քրիստոսի հրաշափառ Հարության տոնի պատարագն այսօր փակ ռեժիմով է անցկացվում։
Տեր Վահրամ քահանա Մելիքյանը Sputnik Արմենիայի հետ զրույցում նշեց, որ ճիշտ է` բոլոր արարողությունները կկատարվեն դռնփակ, բայց եկեղեցականներին թելադրվել է հնարավորության սահմաններում կազմակերպել արարողությունների առցանց հեռարձակում։
«Սա վերաբերում է նաև մյուս երկրներում գործող մեր թեմական կառույցներին։ Թեմակալ առաջնորդներին հանձնարարվել է գործել իրենց երկրներում առկա իրավիճակից ելնելով, հետևելով նաև պետական կառույցների ցուցումներին, որովհետև երկրից երկիր իրավիճակը տարբեր է»,– ասաց Տեր Վահրամը։
Առաջիկա տոներին ու հիշատակի օրերին քաղաքացիները չեն մասնակցի. ՀՀ վարչապետ
Ինչ վերաբերում է սուրբ հաղորդության կարևորագույն խնդրին, ապա նա շեշտեց` սուրբ հաղորդության խորհուրդն այլ է, հնարավոր չէ այն մատուցել առցանց։ Ըստ հոգևորականի՝ յուրաքանչյուր հավատացյալ անձ մասնակցելով պատարագին` նաև հաղորդվում է, հետևաբար, սուրբ հաղորդության պարագայում թելադրվել է, որ ուղղակի հաջորդող օրերին, Սուրբ Զատիկի պատարագից հետո մարդիկ առանձին- առանձին այցելեն եկեղեցիներ և այնտեղ եկեղեցականներից ստանան սուրբ հաղորդություն։
Տեր Վահրամ քահանայի փոխանցմամբ` նախկինում էլ եղել են հայրապետական պատարագների կամ այլ արարողությունների հեռարձակումներ, որովհետև ամեն մի արարողություն չէ, որ կարող է բազմահազար մարդկանց տեղավորել նույն տարածքում։ Հեռասփռումն այս դեպում հնարավորություն է ընձեռում բոլոր ցանկացողներին հաղորդակից լինել արարողության խորհրդին, դրանից բխող պատգամներին ու այդ առթիվ հնչող Ամենայն Հայոց Կաթողիկոսի կամ հանդիսապետի հորդորներին։
Այդուհանդերձ, Տեր Վահրամ քահանայի համոզմամբ` ամեն ինչ չէ, որ պետք է հանգուցալուծվի տեխնիկական միջոցներով։ Այդ ամենի մեջ չպետք է կորցնենք մարդկայինը, այդ ամենում պետք է մնան արժեքները, զգացումներն ու ապրումները, որոնք միշտ չէ, որ հնարավոր է առցանց փոխանցել։
Նշենք, որ Հարության տոնը նաև Զատիկ են անվանում, քանի որ այն նշանակում է զատում, բաժանում, հեռացում մեղքերից և վերադարձ առ Աստված:
Հիսուս Քրիստոսի խաչելությունից և մահից հետո` երեկոյան, մարդիկ նրա մարմինը իջեցրին խաչից և դրեցին գերեզմանի մեջ՝ փակելով մեծ քարով:
Երեք օր հետո` կիրակի առավոտյան, յուղաբեր կանայք` Մարիամ Մագդաղենացին, Հակոբի մայր Մարիամը և Սողոմեն, գնացին գերեզման՝ անուշաբույր յուղերով օծելու Քրիստոսի մարմինը, սակայն զարմանքով տեսան, որ քարայրի մուտքի քարը հեռացված է, իսկ գերեզմանը` թափուր:
Ս. Հարության տոնին հավատացյալները միմյանց ողջունում են «Քրիստոս Յարեաւ ի մեռելոց» ավետիսով, պատասխանում՝ «Օրհնեալ է Յարութիւնն Քրիստոսի»:
Զատկի տոնին հավատացյալները ձու են ներկում: Ներկված ձուն համարվում է hարության և նոր կյանքի խորհրդանիշ: Կարմիր գույնը խորհրդանշում է խաչյալ Հիսուսի արյունը, որ թափվեց մարդկության փրկության համար:
Ինչ պատրաստել Զատիկի սեղանի համար. 5 բաղադրատոմս մեր նախնիներից
