ԵՐԵՎԱՆ, 11 ապրիլի – Sputnik․ ՀՀ փոխվարչապետ, պարետ Տիգրան Ավինյանը Facebook-ի իր էջում շնորհավորել է բոլորին Հիսուս Քրիստոսի հրաշափառ Հարության տոնի (Զատիկ) առթիվ ու խնդրել մնալ տանը, չնայած այն բանին, որ Հայ առաքելակական եկեղեցու հետևորդների, այդ թվում իր համար Զատիկն առավել կարևոր տոներից մեկն է:
«Հաշվի առնելով կորոնավիրուսի տարածման շղթաների անկանխատեսելիությունն ու հավանական վտանգները՝ խստագույնս հորդորում ու խնդրում եմ վաղը փողոց դուրս չգալ, մնալ տանը և չմասնակցել եկեղեցական արարողությունների: Եկեք այս տարի այս նվիրական տոնը նշենք տանը՝ մեր ընտանիքի անդամներով շրջապատված»,–գրել է Ավինյանը:
Պարետը վստահ է, որ բոլորն էլ կհասկանան, որ այս կոչն անում է հանրային առողջությունը և անվտանգությունը պահպանելու նպատակով:
Նա ընդգծել է, որ ցանկացած պարագայում ոստիկանությունը կանխելու է բոլոր մարդկային կուտակումները:
Հիշեցնենք, որ վաղը`ապրիլի 12–ին, Հայ առաքելական եկեղեցին նշում է 5 տաղավար տոներից մեկը` Քրիստոսի հրաշափառ Հարության տոնը։
Հիշեցնենք նաև, որ Հայաստանում կորոնավիրուսի տարածումը կանխելու նպատակով մարտի 16–ից ապրիլի 14–ն արտակարգ դրություն է սահմանված։ Տիգրան Ավինյանն այսօր վարչապետի մոտ կայացած խորհրդակցության ժամանակ առաջարկել է արտակարգ դրության ժամկետը երկարացնել 30 օրով։
Հայաստանում այսօրվա դրությամբ կորոնավիրուսով վարակվելու 977 դեպք է գրանցվել։ Ունենք 13 մահ։
