ԵՐԵՎԱՆ, 9 ապրիլի - Sputnik. ՀՀ քննչական կոմիտեի մամուլի ծառայությունից հայտնում են, որ Արմավիրի մարզային քննչական վարչության Վաղարշապատի քննչական բաժնում բացահայտվել են 29-ամյա կնոջ մասնակցությամբ մի շարք հանցագործություններ։
Էջմիածին քաղաքի 29-ամյա բնակչուհին, նախնական համաձայնության գալով Արարատի մարզի 48-ամյա բնակչի հետ, 2019թ. ապրիլի 12-ին՝ ժամը 21:00-23:30-ի միջակայքում մուտք են գործել Էջմիածնի Մաշտոցի փողոցում գտնվող շենքի բնակարաններից մեկը և այնտեղ բնակվող 81-ամյա համաքաղաքացուն կապել են կպչուն ժապավենով, այնուհետև բութ, կոշտ առարկայով հինգ հարված հասցրել նրա գլխին, ինչի հետևանքով տղամարդը մահացել է:
«Այնուհետև վերցրել են 81-ամյա տղամարդու տան, պահեստի, երկաթյա պահարանի, ավտոտնակի և ավտոմեքենայի բանալիները, մուտք են գործել նույն փողոցում գտնվող վերջինիս պատկանող կոնյակի խանութ, ավտոտնակ և հափշտակել նրան պատկանող «Lexus RX 330» մակնիշի ավտոմեքենան ու դիմել փախուստի»,- նշված է հաղորդագրության մեջ:
Քննչական կոմիտեից հայտնում են, որ կնոջ հանցավոր գործեղություններն այսքանով չեն սահմանափակվել․ նախաքննության ընթացքում բացահայտվել են նաև նրա կողմից կատարված առերևույթ հանցագործությունների այլ դրսևորումներ:
Երևանում տրանսգենդերները էլեկտրաշոկով էլեկտրահարել և թալանել են մի տղայի
Մասնավորապես՝ 29-ամյա կինը, 2018թ-ի նոյեմբերի 17-ին` ժամը 20:10-ից 20:30-ն ընկած ժամանակահատվածում, Էջմիածին քաղաքի Վռամ Կոստանյան փողոցի բնակարաններից մեկում, նախկինում ունեցած տարաձայնությունների շուրջ ծագած վիճաբանության ընթացքում երկաթյա առարկայով 3 անգամ դիտավորությամբ հարվածել տանտիրուհու գլխին՝ պատճառելով մարմնական վնասվածքներ:
Բացի այդ, 2018թ. դեկտեմբերի 22-ին` ժամը 03:00-ի սահմաններում, 29-ամյա կինը ուրիշի գույքի գաղտնի հափշտակություն կատարելու նպատակով 59-ամյա տաքսու վարորդին խնդրել է օժանդակել իրեն. վերջինիս ավտոմեքենայով ուղևորվել է Գեղարքունիքի մարզի Չկալովկա գյուղ, ապօրինի մուտք գործել գյուղի անասնագոմերից մեկը, գաղտնի հափշտակել է խոշոր չափերի հասնող՝ 780.000 ՀՀ դրամ ընդհանուր արժեքով 12 գլուխ ոչխար:
Նույն կինը 2019թ. հունվարի 19-ին` ժամը 01:30-ից մինչև 06:30-ն ընկած ժամանակահատվածում, ապօրինի մուտք գործելով Նար-Դոս փողոցում գտնվող հագուստի խանութ-սրահ, հափշտակել է հագուստներ, սպորտային կոշիկներ՝ պատճառելով խոշոր չափերի հասնող՝ ընդհանուր՝ 820.000 ՀՀ դրամի գույքային վնաս:
Այնուհետև, 29-ամյա կինը, 2019 թվականի հունվարի 28-ին` ժամը 12:05-13:30-ը, իր ծանոթին տեսակցելու պատրվակով հյուրընկալվել է վերջինիս և օգտվելով տանտիրոջ՝ հյուրասենյակից բացակայելու հանգամանքից, գաղտնի հափշտակել է նրա անձնագիրը, որը հետագայում ներկայացնելով՝ վարձակալությամբ վերցրել է 2 համակարգիչ:
Հայաստանյան արտակարգ դրությունը «խփել» է հանցագործներին
29-ամյա կնոջը մեղադրանք է առաջադրվել՝ ՀՀ քրեական օրենսգրքի 104-րդ հոդվածի 2-րդ մասի 7-րդ և 8-րդ կետերով (սպանություն մի խումբ անձանց կամ կազմակերպված խմբի կողմից, շահադիտական դրդումներով, պատվերով, ինչպես նաև զուգորդված՝ շորթմամբ), ՀՀ քրեական օրենսգրքի 118-րդ հոդված
(ծեծելը կամ այլ բռնի գործողություններ կատարելով), ՀՀ քրեական օրենսգրքի 177-րդ հոդվածի 2-րդ մասի 1-ին, 2-րդ և 3-րդ կետերով (գողություն մի խումբ անձանց կողմից նախնական համաձայնությամբ, խոշոր չափերով,պահեստարան կամ շինություն ապօրինի մուտք գործելով), և ՀՀ քրեական օրենսգրքի 324-րդ հոդվածի 1-ին մասով (փաստաթղթեր, դրոշմներ, կնիքներ հափշտակելը կամ վնասելը):
48-ամյա տղամարդուն մեղադրանք է առաջադրվել՝ ՀՀ քրեական օրենսգրքի 104-րդ հոդվածի 2-րդ մասի 7-րդ և 8-րդ կետերով: Նրանց նկատմամբ խափանման միջոց է ընտրվել կալանավորումը: Իսկ 59-ամյա տաքսու վարորդին մեղադրանք է առաջադրվել՝ ՀՀ քրեական օրենսգրքի 38-րդ հոդվածի 5-րդ մասով (հանցագործությանը օժանդակելու) և ՀՀ քրեական օրենսգրքի 177-րդ հոդվածի 2-րդ մասի 1-ին, 2-րդ և 3-րդ կետերով (գողությունը, որը կատարվել է մի խումբ անձանց կողմից նախնական համաձայնությամբ, խոշոր չափերով, պահեստարան կամ շինություն ապօրինի մուտք գործելով), և խափանման միջոց է ընտրվել ստորագրություն չհեռանալու մասին:
Քրեական գործը՝ մեղադրական եզրակացությամբ ուղարկվել է դատարան։
Ողբերգական ավտովթար Գեղարքունիքի մարզում․ «MAN»-ի վարորդը տեղում մահացել է
