ԵՐԵՎԱՆ, 27 մարտի – Sputnik. ՀՀ աշխատանքի և սոցիալական հարցերի նախարարության աշխատակազմի բժշկասոցիալական փորձաքննության գործակալության հանձնաժողովներից մեկի նախագահը կաշառք վերցնելու պահին ձերբակալվել է։ Տեղեկությունը հայտնում է ԱԱԾ մամուլի ծառայությունը։
Ստացված փաստական տվյալների համաձայն՝ պաշտոնյան և հանձնաժողովի մյուս 2 անդամները, փորձաքննության դիմած քաղաքացիների օգտին նախընտրելի որոշումներ են կայացրել՝ հաշմանդամ ճանաչելու, տևողության ժամկետը սահմանելու, հաշմանդամության խումբը փոխելու համար։ Ապօրինի ձևակերպումների դիմաց հանձնաժողովի նախագահը 20.000-ից մինչև 100.000 դրամ կաշառք է պահանջել, որից բաժին է հանել նաև հանձնաժողովի անդամներին։
Միայն 2020 թ-ի մարտ ամսվա ընթացքում փորձաքննության դիմած 6 անձանցից նա մաս-մաս կաշառք է վերցրել՝ ընդհանուր առմամբ 300.000 դրամ, իսկ 2020 թ-ի մարտի 23-ին իր աշխատասենյակում հերթական անգամ կաշառքը ստանալու պահին ԱԱԾ աշխատակիցները նրան բերման են ենթարկել։
«Կարո՞ղ եմ ասել` այսօր ոչ մի պաշտոնյա կաշառք չի վերցնում». Փաշինյանը խոսեց բացթողումներից
Խուզարկությամբ հայտնաբերվել և առգրավվել է կաշառքի առարկան, իսկ կաշառք տվող անձինք խոստովանել են հանցագործության կատարումը։ Նախաքննությունը շարունակվում է։
