Լիլիթ Հարությունյան, Sputnik Արմենիա
Լուսինե Հարությունովան հավատում էր իր ուժերին, սակայն «Ну-ка, все вместе!» ռուսական հեռուստաշոուում ելույթի ժամանակ` պայթած ռումբի նման արձագանքի չէր սպասում, թեև Կրասնոդարից ժամանած աղջիկը բազում մրցույթների է մասնակցել։ 2014 թվականին նա առաջին տեղն է զբաղեցրել «Караоке без границ» Ռուսաստանի առաջնությունում։ Երեք տարի առաջ երիտասարդ կատարողը Հայաստանի «Ձայնի» կիսաեզրափակիչ է դուրս եկել, սակայն ռուսական «Ձայնի» հարցում նրա բախտը չբերեց։
«Ինձ ընտրեցին քասթինգում, հարցրազրույց վերցրին։ Հետո ուղարկեցին Կրասնոդար և ասացին՝ սպասիր, մինչև կզանգեն կույր լսումներին գնալու համար։ Սակայն, այդպես էլ չզանգահարեցին։ Ինքս զանգեցի, պարզվեց՝ որոշել են ինձ չվերցնել։ Չգիտեմ` ինչու»,- պատմում է Լուսինեն։
Աղջիկը չի բացառում՝ հնարավոր է, պատճառն այն է, որ հայկական «Ձայնը» նախագծից մեկ տարի էլ չէր անցել։
Իսկ «Ну-ка, все вместе!» նախագծում աղջկա ելույթի ժամանակ ժյուրիի 100 անդամներից 99-ը ոտքի կանգնեցին։ Դա իսկական հաղթանակ էր։
Մրցույթի կանոնների համաձայն, մասնակիցներն իրենց կատարմամբ պետք է կարողանան ժյուրիի 100 անդամներին ստիպել ոտքի կանգնել ու իրենց հետ միասին երգել։ Ժյուրիի յուրաքանչյուր անդամ 1 միավոր է շնորհում երգչին։
Լուսինեն կատարում էր բրիտանացի երգիչ Ռորի Գրեյմանի (որն ավելի հայտնի է Rag'N'Bone Man կեղծանունով) Human երգը։ Նրա ելույթից հետո երգիչ Սերգեյ Լազարևը խոստովանել էր, որ ցնցված էր ու ակամա ցատկոտում էր։
«ՎԻԱ Գրա» խմբի նախկին մենակատարուհի Նադեժդա Գրանովսկայան հիացմունքով նշել էր․ «Սա լրիվ անիրական է։ Ֆանտաստիկ տեմբր ունեք։ Փշաքաղվեցի»։
Լուսինեն հույս ուներ, որ նախագիծն իր համար կբացի դեպի մեծ շոու բիզնես տանող դռները։
Իսկ ի՞նչ է տվել նրան հայկական «Ձայնը»։ Բացի այն, որ կիսաեզրափակիչ է հասել, աղջիկը նաև իր համար պատմական հայրենիքն է բացահայտել։
Տպավորությունների և հետաքրքրասեր հարևանների մասին
«Ծնվել եմ Թբիլիսիում, մեծացել՝ Ռուսաստանում։ Մինչև մրցույթը երբեք չէի եղել Հայաստանում»,-ասում է Լուսինեն։ Երգչուհին խոստովանում է, որ Հայաստանում ամենաշատը իրեն դուր են եկել մարդիկ։
«Հայաստանում մարդիկ ավելի բարի են, դիմացինին հասնող, ավելի ուշադիր։ Միշտ փորձում են օգնել»,- նշում է նա։
Սակայն, միաժամանակ, նրա կարծիքով, ազգային մտածելակերպից դրդված, նույն մարդիկ հաճախ չափն անցնում են ու սկսում են ներխուժել դիմացինի անձնական կյանք։
Լուսինեն մրցույթի ընթացքում կես տարի Երևանում է բնակվել, միայն կարճ ժամանակով է Կրասնոդար մեկնել։ Ապրել է բարեկամուհու տանը, որն, ըստ նրա, ավելի հանդուրժող է` քան նրա հարևանները։
«Մարդիկ Հայաստանում այնքան են միմյանց կյանքով ապրում, որ երբեմն դիմացինի անձնական տարածք են ներխուժում։ Օրինակ` հարևանները միշտ հարցնում էին՝ ինչու եմ տարբեր մեքենաներով գալիս, թեև դրանք տաքսիներ էին։ Եթե նախագծի մասնակիցներից մեկն ինձ ճանապարհում էր, հարցնում էին՝ ինչու մենակ չեմ եկել», - ժպիտով պատմում է Լուսինեն։
Ընդհանուր առմամբ, աղջկա խոսքով, նա մեծ հաճույք է ստացել և՛ «Ձայնը» նախագծին մասնակցելուց, և՛ լրիվ այլ միջավայրում հայտնվելուց։ Երգչուհու խոսքով, Հայաստանում քիչ բան է հասցրել տեսնել։
Ջերմության հետքերով․ ինչպես ամերիկուհու թեթև ձեռքով Գյումրին հայտնվեց Forbes-ում
Լուսինեն Գառնի, Գեղարդ ու Սևան է գնացել։ Բողոքում է, որ չի հաջողվել ամբողջ երկրով շրջել, բայց մի քանի էքսկուրսիայի շնորհիվ հասցրել է հասկանալ` որքան հին երկիր է Հայաստանը։
Հարցին, թե ինչ է բացահայտել պատմական հայրենիքում, Լուսինեն առանց երկմտելու պատասխանում է․ «Բարեկամներիս։ Դա կարող եմ հաստատ ասել։ Մենք նախկինում երբեք չէինք հանդիպել ու գրեթե չէինք շփվում, իսկ հիմա արդեն մտերիմներ ենք»։
Շոու-բիզնեսի նրբություններն ու նվիրական երազանքը
Լուսինեն Կրասնոդարի լանչ-բարերում ելույթ է ունենում Սոլանժ կեղծանունով, սակայն երազում է մեծ բեմերում երգել, բայց հասկանում է, որ դրա համար ո՛չ տաղանդը, ո՛չ էլ աշխատասիրությունը բավարար չեն։
«Պետք է երգես որոշակի ձևաչափով, որը հիմա ամենապահանջվածն է։ Երբեմն ուժեղ, գեղեցիկ, հզոր ձայները ոչ ոքի պետք չեն։ Ցավոք, հենց այդ պատճառով, լավ ձայնային տվյալներ ունեցող բազում արտիստներ չեն կարողանում մուտք գործել շոու-բիզնես»,-ընգդծում է Լուսինե Հարությունյանը։
Լուսինեն հիմնականում բլյուզ, սոուլ, ջազ, R'n'B ոճի երգեր է կատարում։ Նա նաև հեղինակային երգեր է գրում ու երբեմն ձայնագրում դրանք։ Ասում է, որ 2019 թվականն այդ առումով բավականին արդյունավետ տարի էր․ նա ստուդիայում ինը հեղինակային կատարում է ձայնագրել։
Տաղանդավոր աղջիկը երազում է նորից այցելել պատմական հայրենիք, բայց այս անգամ` համերգով ու իր սեփական ալբոմը ներկայացնելու համար։ Անկեղծանում է՝ դատելով մարդկանց արձագանքից, երկրպագուներ ունի ինչպես Հայաստանում, այնպես էլ` սփյուռքում, այնպես որ «դահլիճը դատարկ չի մնա»։
Հավելենք, որ երիտասարդ աղջկա իսկապես հարուստ տեմբրին ու բեմական հմայքին անհնար է դիմադրել, կարևորը՝ նրան տեսնելն ու լսելն է։
