ԵՐԵՎԱՆ, 3 փետրվարի — Sputnik. Արմավիրի մարզում ողբերգական դեպք է տեղի ունեցել։ Երեկ` փետրվարի 2–ին, երբ Արցախի զորամասերից մեկում մահացած 20-ամյա զինծառայող Վահրամ Ավագյանի հարազատները բողոքի ակցիա էին անում` զինվորի դին ոտքով տեղափոխելով Երևան, ակցիային մասնակցող տղամարդկանցից մեկը հանկարծամահ է եղել։ Spuntik Արմենիայի հետ զրույցում Հայթաղի ղեկավար Մերուժան Մուրադյանը հայտնեց, որ գյուղացիները տղամարդուն շտապ տեղափոխել են Էջմիածնի բժշկական կենտրոն, սակայն բժիշկներն ասել են, որ նա արդեն մահացած է։
«Մահացածը` 62-ամյա Մարտուն Աբելյանը, մեր համագյուղացին էր։ Զինվորի` Վահրամի մահվան դեպքը բոլորիս էր հունից հանել, բոլորս էինք նրանց ընտանիքի ցավով ապրում։ Արդեն չգիտեմ` Մարտունը հարևա՞ն էր, թե՞ բարեկամ զինվորի ընտանիքին, քանի որ դա կարևոր էլ չէ` բոլորս ենք սգում։ Մարտունը դագաղի ներքևից էր բռնել, չի էլ հասցրել 200 մետր քայլել, ինֆարկտ է խփել ու դագաղի «տակ է մնացել»»,–պատմեց համայնքի ղեկավարը։
Մուրադյանի խոսքով` երեկ, երբ զինծառայողի դին որոշել էին ոտքով Երևան բերել, շատերի ինքնազգացողությունն է վատացել։
Առաքել Մովսիսյանի որդին ձերբակալվել է զինծառայողի մահվան գործով
Ավելի վաղ հայտնել էինք, որ հունվարի 30-ին Արցախում մահացած ժամկետային զինծառայող Վահրամ Ավագյանի հարազատները երեկ նրա դագաղը ոտքով տեղափոխում էին Երևան: Նրանք չեն հավատում, որ իրենց որդին ինքնասպան է եղել և պահանջում են արդար քննություն։ Ճանապարհին, սակայն, նրանց է մոտեցել ՀՀ պաշտպանության նախարար Դավիթ Տոնոյանը, հորդորել է գյուղ վերադառնալ ու խոստացել` գործը բացահայտվելու է։
Հիշեցնենք` Արցախի պաշտպանական գերատեսչության հաղորդմամբ` հունվարի 30-ին, ժամը 13:15-ի սահմանում, ՊԲ կենտրոնական ենթակայությամբ գործող զորամասերից մեկում, դեռևս չպարզված հանգամանքներում, մահացու հրազենային վիրավորում էր ստացել ՊԲ զինծառայող, 2000թ. ծնված Վահրամ Մկրտիչի Ավագյանը:
Ավելի ուշ ՀՀ քննչական կոմիտեն էլ հայտնել էր, որ 2020թ. հունվարի 30-ին, ժամը 13:15-ի սահմաններում, ՊԲ բանակային ուսումնական կենտրոնում, N զորամասի պարտադիր ժամկետային զինծառայող, շարքային Վահրամ Մկրտիչի Ավագյանն իրեն ամրակցված ԱԿՄ տեսակի ինքնաձիգից կրակոցներ է արձակել իր կրծքավանդակի շրջանում և ստացած հրազենային վնասվածքներով տեղափոխվել զինվորական հոսպիտալ, որտեղ ժամը 14:00-ին արձանագրվել էր վերջինիս կենսաբանական մահը:
«Շատ խելոք, դաստիարակված երեխա էր». համագյուղացիները պատմել են մահացած զինծառայողի մասին
