Հայաստանի ֆինանսական համակարգը տարածաշրջանի ամենակայուն համակարգերից է։ Sputnik Արմենիայի հետ զրույցում հայաստանյան բանկային համակարգն այս կերպ բնորոշեց ՀՀ ԿԲ Ֆինանսական կայունության դեպարտամենտի տնօրեն Անդրանիկ Գրիգորյանը։
«Վերջին մի քանի տարիների, վերջին մի քանի փորձությունների ընթացքում մեր ֆինանսական համակարգը` մասնավորապես` բանկային համակարգն ապացուցեց, թե որքան ունակ է տարբեր տեսակի զարգացումներին` թե՛ տարածաշրջանային, թե՛ ներքին։ Դրա վառ օրինակներն են 2009, 2014, 2018թ–երին տեղի ունեցած իրադարձությունները»,– ասաց նա։
Նրա խոսքով` ՀՀ բանկային համակարգը ոչ մի բանով պակաս չէ աշխարհի զարգացած երկրների բանկային համակարգերից։
«Եթե Շվեյցարիայում կամ այլ երկրներում բանկերի հաճախորդներն ունեն մի տեսակի պահանջ, մեզ մոտ հասարակությունն ունի այլ տեսակի պահանջ։ Ֆինանսական կազմակերպությունները բավարարում են այդ պահանջը։ Թե՛ Շվեյցարիայում, թե՛ Հայաստանում, թե՛ ԱՄՆ–ում, թե՛ Վրաստանում, որտեղ էլ լինի, բանկերը միջնորդներ են, որոնք ֆինանսական միջոցներ են ներգրավում խնայողություն ունեցողներից, և տրամադրում են ներդրումներ իրականացնելու կարիք ունեցողներին»,– նշեց Գրիգորյանը։
Ինչպես չդառնալ խարդախության զոհ. Հայաստանի բանկերի միավորումն ինֆորմացիոն արշավ է սկսել
Անդրադառնալով 2018թ–ի հեղափոխությունից հետո տարածված այն լուրերին, որ Հայաստանից մեծ ծավալի կապիտալի արտահոսք կա, Գրիգորյանը պատասխանեց`պաշտոնական վիճակագրության տվյալներով` 2018թ–ի վերջին 2017–ի համեմատ Հայաստանի բանկերում նույնիսկ ավանդների աճ է գրանցվել։
«Եթե նույնիսկ գումարները դուրս էին եկել որոշ չափով, ապա նույքան ավանդները վերադարձան, մի բան էլ ավելին»– ընդգծեց նա։
Ըստ Գրիգորյանի` ՀՀ բանկային համակարգում վերջին 12-13 տարիներին ավանդների աճ է գրանցվել, հատկապես մանր ավանդների։
Տեսակետը, թե բանկում ներդրած «պարապ փողերը» տնտեսության զարգացմանը չեն նպաստում, տնտեսագետը չի կիսում։ Նրա համոզմամբ` բանկում ներդրված ավանդներն ուղղվում են տնտեսության ֆինանսավորմանը։
«Դրանց մի մասը դառնում է կապիտալ ներդրում, մի մասը դառնում է շրջանառու միջոցների ֆինանսավորման աղբյուր, բայց պարտադիր ուղղվում են տնտեսությանը։ Բանկային համակարգի վարկ/ավանդ հարաբերակցությունը կազմում է շուրջ 1/1, ինչը խոսում է այն մասին, որ ավանդներն ամբողջությամբ, ուղղվում են վարկավորմանը»,– համոզմունք հայտնեց Գրիգորյանը։
Դրամային ավանդների միջին տոկոսադրուքը Հայաստանի բանկերում, մեր զրուցակցի տվյալներով` տատանվում է 8-9 տոկոսի սահմաններում, իսկ ավանդատուներն իրենց խնայողությունները գերադասում են պահել ազգային արժույթով։
«Ներդրված ավանդների շուրջ 55 տոկոսը դրամով է»,– հայտնեց Գրիգորյանը։
ԿԲ Ֆինանսական կայունության դեպարտամենտի տնօրենի հետ զրույցում չեն շրջանցվել նաև սպառողական ու հիպոթեկային շուկաների, ինչպես նաև` ապահովագրության ոլորտի զարգացման հնարավոր ռիսկերի թեման։
