ԵՐԵՎԱՆ, 20 դեկտեմբերի — Sputnik. Ապրիլյան պատերազմի հանգամանքներն ուսումնասիրող քննիչ հանձնաժողովը մինչև տարեվերջ հարցաքննության չի հրավիրի Սերժ Սարգսյանին, Սեյրան Օհանյանին և Յուրի Խաչատուրովին:
Այս մասին գրում է «Հրապարակ» թերթը` ընդգծելով, որ հանձնաժողովի նախագահ Անդրանիկ Քոչարյանն այդ հարցաքննությունները խոստացել էր։
«Հանձնաժողովը, ըստ ամենայնի, չի ստացել այնպիսի «կասկածելի» տեղեկատվություն, որոնք պետք է պարզաբանեն նշված անձինք»,–գրում է թերթը։
Հիշեցնենք` Ապրիլյան քառօրյա պատերազմի հանգամանքների ուսումնասիրության քննիչ հանձնաժողովը ստեղծվել էր ԱԺ–ի` 2019թ.–ի մայիսի 31-ին ընդունած որոշմամբ` 6 ամիս ժամկետով։ Դեկտեմբերի 6-ին Անդրանիկ Քոչարյանի առաջարկով ԱԺ–ը որոշեց հանձնաժողովի գործունեության ժամկետը երկարաձգել ևս 6 ամսով։
Ապրիլյանի հանգամանքներն ուսումնասիրող հանձնաժողովը պարտավոր է լսել Սերժ Սարգսյանին
Այդ լրացուցիչ ժամանակահատվածում հանձնաժողովն, ըստ Քոչարյանի, պատրաստվում է լսել պաշտոնյաների պարզաբանումները։ Նրանց թիվը, հանձնաժողովի նախագահի խոսքով, կարող է հասնել 40-ի։
Նախորդ 6 ամսվա ընթացքում հանձնաժողովը 21 նիստ էր գումարել, որոնցում հարցաքննել էր 10 զինծառայողների։
Ապրիլյան պատերազմի օրերին զինվորները նորմալ բուժօգնություն չեն ստացել. «Ժողովուրդ»
Բացի այդ ՊՆ–ից հանձնաժողով են ուղարկվել մեծ ծավալի փաստաթղթեր, որոնցից առայժմ ուսումնասիրվել է 2684 էջը` 147 տեքստային և 14 գրաֆիկական քարտեզներով, տեղեկատվական– վերլուծական և հետախուզական, զորքերի կառավարման, օպերատիվ և այլ բնույթի գաղտնի և հույժ գաղտնի փաստաթղթերով։
