ԵՐԵՎԱՆ, 19 դեկտեմբերի — Sputnik. Ազգային ժողովի ապրիլյան պատերազմի հարցերով քննիչ հանձնաժողովն այսօր հերթական նիստն է գումարել։
Շուրջ 3 ժամ դռնփակ նիստին հրավիրվել ու մասնակցել է 2016թ–ին ՀՀ զինված ուժերի հրթիռային զորքերի և հրետանու վարչության պետ, գեներալ-մայոր Ալբերտ Մարդոյանը։
Նիստից հետո հանձնաժողովի նախագահ Անդրանիկ Քոչարյանը լրագրողներին հայտնեց, որ բարձրաստիճան զինվորականը կարևոր տեղեկություններ է փոխանցել ապրիլյան պատերազմի վերաբերյալ: Թե կոնկրետ ինչ տեղեկություններ Քոչարյանը չհայտնեց ու Մադոյանին էլ թույլ չտվեց հայտնել։
Մադոյանին ուղղված հարցին, թե ինչ հետևությունների հանգել գեներալն ապրիլյան պատերազմից հետո, պատասխանեց Քոչարյանը` լրագրողներին մեղադրելով զինվորականին քաղաքական հարցեր տալու համար։
«Բացառում եմ Ապրիլյան պատերազմին հայաստանյան կողմից դավադիր գործողությունները». Տոնոյան
«Դուք հիմա քաղաքական հարցեր եք տալիս գեներալին։ Ես բան եմ ասում ձեզ։ Այդ հարցերը դուք պետք է տաք, երբ որ վերջնական եզրակացություններն ընթերցեք։ Սխալ է քաղաքական հարցեր տալ զինվորականին, որը կանգնած է եղել բանակի ակունքներում, երբ նրանից մենք իր մասնագիտական հմտությունները և այդ ժամանակաշրջանի իր ղեկավարած կառույցների մասին մեր հարցերի պատասխաններն ենք ստացել»,– ասաց Քոչարյանը` լրագրողներին առաջարկելով քաղաքական հարցերը տալ իրեն։
Եվ, այդուհանդերձ, Մադոյանը դեմ չէր շփվել լրագրողների հետ։ Իրեն ուղղված հարցերին գեներալն այսպես պատասխանեց. «Հրետանին պատերազմի Աստվածն է։ Աստվածն իր գործը կատարել է»։
Այս պատասխանից հետո Անդրանիկ Քոչարյանը ԱԺ շենքից դուրս ուղեկցեց Ալբերտ Մադոյանին` լրագրողներին արգելելով հարցեր տալ նրան։
«Այդ հարցերը մի քանի ամիսն հետո կտաք ինձ»,– ասաց նա։
Հիշեցնենք` Ապրիլյան քառօրյա պատերազմի հանգամանքների ուսումնասիրության քննիչ հանձնաժողովը ստեղծվել էր ԱԺ–ի` 2019թ.–ի մայիսի 31-ին ընդունած որոշմամբ` 6 ամիս ժամկետով։ Դեկտեմբերի 6-ին Անդրանիկ Քոչարյանի առաջարկով ԱԺ–ը որոշեց հանձնաժողովի գործունեության ժամկետը երկարաձգել ևս 6 ամսով։
Այդ լրացուցիչ ժամանակահատվածում հանձնաժողովն, ըստ Քոչարյանի, պատրաստվում է լսել պաշտոնյաների պարզաբանումները։ Նրանց թիվը, հանձնաժողովի նախագահի խոսքով, կարող է հասնել 40-ի։
Ինչու է աշխատանքից ազատվել Մովսես Հակոբյանը. ինստիտուտը խնդիրնե՞ր է առաջացրել
Նախորդ 6 ամսվա ընթացքում հանձնաժողովը 21 նիստ էր գումարել, որոնցում հարցաքննել էր 10 զինծառայողների։
Բացի այդ ՊՆ–ից հանձնաժողով են ուղարկվել մեծ ծավալի փաստաթղթեր, որոնցից առայժմ ուսումնասիրվել է 2684 էջը` 147տեքստային և 14 գրաֆիկական քարտեզներով, տեղեկատվական– վերլուծական և հետախուզական, զորքերի կառավարման, օպերատիվ և այլ բնույթի գաղտնի և հույժ գաղտնի փաստաթղթերով։
