ԵՐԵՎԱՆ, 25 նոյեմբերի — Sputnik. Մարտի 1-ի գործով դատապարտված Մուշեղ Սաղաթելյանն այսօր արդարացվել և անմեղ է ճանաչվել։ Այս մասին այսօր Երևանի ընդհանուր իրավասության դատարանում տեղի ունեցած նիստի ժամանակ ասաց դատավոր Մեսրոպ Մակյանը։
«Դատարանը վճռեց Մուշեղ Սաղաթելյանին արդարացնել՝ ճանաչելով ու հռչակելով նրա անմեղությունը նրան մեղսագրված արարքներում հանցակազմի բացակայության հիմքով։ Նրան համապատասխան ծանուցում կուղարկվի, թե ինչպես պետք է վնասի փոխհատուցում իրականացվի»,–ասաց Մակյանը։
Նա նշեց նաև, որ դատավճիռը կարող է բողոքարկվել վերաքննիչ քրեական դատարանում` մեկամսյա ժամկետում։
Հիշեցնենք, որ ՀՀ գլխավոր դատախազ Արթուր Դավթյանն այս տարվա հունվարի 31–ին դիմել էր ՀՀ վճռաբեկ դատարան՝ բեկանելու և նոր քննության ուղարկելու մարտիմեկյան գործերով դատապարտված Մուշեղ Սաղաթելյանի վերաբերյալ քրեական գործը։ Սաղաթելյանի գործով նոր քննությունը սկսվել էր 2019-ի օգոստոսի 5-ին։
Եվրոպական դատարանը Մարտի 1-ի գործով առաջին վճիռն է կայացրել
2008-ի հոկտեմբերի 23-ի դատավճռով Սաղաթելյանին մեղադրանք էր առաջադրվել այն բանի համար, որ նա, մասնակցելով 2008թ. նախագահական ընտրություններից հետո Երևանում իրականացվող զանգվածային հրապարակային միջոցառումներին, 2008թ. մարտի 1-ի առավոտյան Ազատության հրապարակում, ապա ավելի ուշ Արշակունյաց պողոտայում, չենթարկվելով ոստիկանության աշխատակիցների օրինական պահանջներին, հրելու, քաշքշելու և ոտքով հարվածելու եղանակով առողջության համար ոչ վտանգավոր բռնություն է գործադրել նրանց նկատմամբ և փախուստի փորձ կատարել: Նրան մեղադրանք էր առաջադրվել նաև քաղաքացիական շեղբավոր սառը զենք հանդիսացող գործարանային արտադրության դանակ կրելու համար:
Հետագայում Վերաքննիչ քրեական դատարանն առաջին ատյանի դատարանի վճիռը թողել էր անփոփոխ, իսկ Վճռաբեկ դատարանն առանց քննության էր թողել պաշտպանական կողմի ներկայացրած բողոքը: Այսպիսով` Լևոն Տեր-Պետրոսյանի նախընտրական շտաբի Շիրակի մարզի ներկայացուցիչ, կալանավայրերի վարչության նախկին պետ Մուշեղ Սաղաթելյանը դատապարտվել էր 5 տարվա ազատազրկման և 900 000 դրամ տուգանքի։
2018թ. սեպտեմբերի 20-ին «Մուշեղ Սաղաթելյանն ընդդեմ Հայաստանի Հանրապետության» գործով Մարդու իրավունքների եվրոպական դատարանն արձանագրել էր Սաղաթելյանի նկատմամբ թույլ տրված իրավունքների խախտումները և ՀՀ–ին պարտավորեցրել տուժողին որպես բարոյական վնասի փոխհատուցում վճարել 15 600 եվրո և ևս 5 000 եվրո՝ դատական ծախսերի համար:
Հայտնի է` որտեղ կտեղադրվի Մարտի 1-ի զոհերի հիշատակին նվիրված հուշարձանը
ՄԻԵԴ որոշումն ուժի մեջ է մտել 2018 թվականի դեկտեմբերի 20-ին: ՀՀ կառավարությանը 3 ամիս ժամանակ է տրվել ՄԻԵԴ վճիռը կատարելու համար։
