ԵՐԵՎԱՆ, 20 նոյեմբերի — Sputnik. ԵԱՏՄ անդամ երկրներից մեկի տարածքում գործող ընկերությունը յուրացրել է Հայաստանում արտադրվող «Օրբիտա» եռակցման սարքավորման ապրանքանիշը։ Այս մասին այսօր Հայաստանում ընթացող «Արդյունավերտ մրցակցության ապահովումը թվայնացվող աշխարհում» համաժողովի ժամանակ հայտնեց Մրցակցության ու հակամենաշնորհային կարգավորման հարցերով Եվրասիական տնտեսական հանձնաժողովի կոլեգիայի անդամ (նախարար) Սերիկ Ժումանգարինը։
«Հայկական կողմը հաղորդում է ներկայացրել, որ սեփական արտադրության ապրանքանիշն անօրինական կերպով օգտագործվում է, այդ անվամբ արտադրվող սարքավորումները` վաճառվում»,– ասաց նա։
Մրցակցության ու հակամենաշնորհային կարգավորման հարցերով Եվրասիական տնտեսական հանձնաժողովում հայ գործարարի ներկայացրած դիմումի հիման վրա հարուցվել է վարույթ, որն այս պահին դեռ ընթացքի մեջ է։
«Մենք արդեն ավարտում ենք այդ գործի քննությունը, և առաջիկայում որոշում կկայացնենք անբարեխիղճ մրցակցության փաստով,– սա ԵԱՏՄ շրջանակում միության անդամ մի երկրի շահերի պաշտպանության վառ օրինակ է»,- ասաց ԵԱՏՄ պաշտոնյան։
Հայկական լոլիկն արտահանում ենք, թուրքականը` ուտո՞ւմ. ներմուծված լոլիկը զսպաշապիկի դեր ունի
Մինչ նախաքննության ավարտը մրցակցության կանոնները խախտած երկրի անունը Ժումանգարինը չցանկացավ հրապարակել` չբացառելով, որ առաջիկայում այդ հարցը կարող է քննվել նաև դատարանում։
Հայաստանի ՏՄՊՊՀ նախագահ Գեղամ Գրիգորյանը ևս չցանկացավ այս վարույթի վերաբերյալ մանրամասներ հայտնել։
«Ելնելով նախաքննության բովանդակությունից` մենք հաճախ չենք կարողանում նախապես տվյալներ հայտնել։ Առևտրային գաղտնիքի ու գաղտնիության վերաբերյալ, նաև պաշտպանության հարցեր կարող են առաջանալ»,– ասաց Գրիգորյանը` հորդորելով սպասել վարույթի ավարտին։
Գրիգորյանը հավելեց, որ այս հարցով Մրցակցության ու հակամենաշնորհային կարգավորման հարցերով Եվրասիական տնտեսական հանձնաժողովի կոլեգիայի որոշումը լինելու է հրապարակային։
Բացի այդ, առաջիկայում մրցակցության խախտման մեկ այլ դեպքով նոր վարույթ է հարուցվելու, որի մասին ևս տվյալներ առայժմ չեն հրապարակում։
Բայց այս վարույթները, Գևորգյանի դիտարկմամբ, վկայում են, որ ԵԱՏՄ ձևաչափը սկսել է ակտիվ կիրառվել առկա խնդիրները լուծելու, գործարարների շահերը պաշտպանելու համար։
Հայաստանը պատրա՞ստ է մտնել Եվրամիություն. Փաշինյանի պատասխանը
Հիշեցնենք` Երևանում այսօր մեկնարկել է Մրցակցության միջազգային օրվան նվիրված «Արդյունավետ մրցակցության ապահովումը թվայնացվող աշխարհում» համաժողովը, որին մասնակցում է Եվրասիական տնտեսական հանձնաժողովի կոլեգիայի անդամ (նախարար) Սերիկ Ժումանգարինը։
Համաժողովին ներկա են նաև ՀՀ կառավարության ներկայացուցիչները` փոխվարչապետ Ավինյանի գլխավորությամբ։ Գործարարների հետ քննարկումը նախատեսված է օրվա երկրորդ կեսին։
