ԵՐԵՎԱՆ, 20 նոյեմբերի — Sputnik. Հայ գործարարներն այսօր բավական ազատ աշխատում են ռուսաստանյան առևտրի ցանցերի հետ։ Այսօր Հայաստանում ընթացող «Արդյունավետ մրցակցության ապահովումը թվայնացվող աշխարհում» համաժողովի ժամանակ, անդրադառնալով նախկինում այս ոլորտում ծագած խնդիրներին ասաց Մրցակցության ու հակամենաշնորհային կարգավորման հարցերով Եվրասիական տնտեսական հանձնաժողովի կոլեգիայի անդամ (նախարար) Սերիկ Ժումանգարինը։
«ԵԱՏՄ–ն դա 180 մլն–անոց շուկա է, որի ավելի քան 80 տոկոսը զբաղեցնում է ռուսական շուկան։ Եվ այդ շուկայում ռուսաստանյան առևտրի ցանցերն, իհարկե, գերիշխող դիրք են գրավում։ Դուրս գալ ռուսաստանյան առևտրի ցանց, նշանակում է առաջարկել բարձր որակի ապրանք, ապահովել բազմազանություն` բավարարելով շուկայի բոլոր պահանջները։ Հայկական գործարարներն այս պահանջներին բավարարում են։ Սա վկայում է այն մասին, որ Հայաստանում արտադրվող ապրանքատեսակները կարող են անհրաժեշտ որակ ապահովել ԵԱՏՄ բոլոր երկրների համար»,– ասաց նա։
Հայաստանյան բիզնեսը, նրա խոսքով, այսօր ավելի մեծ հնարավորություններ ունի ՌԴ առևտրային ցանցերի հետ անմիջականորեն աշխատելու։
«Ես կարծում եմ այդ խնդիրն այնքան սուր չէ, որքան տարիներ առաջ, քանի որ այդ հարցին մեծ ուշադրություն դարձվեց, այն արդեն լուծված է։ Գուցե որոշ խնդիրներ մնացել են։ Մենք այդ հարցն այսօր կքննարկենք հայ գործարարների հետ»,- ասաց Սերիկ Ժումանգարինը։
Հայկական լոլիկն արտահանում ենք, թուրքականը` ուտո՞ւմ. ներմուծված լոլիկը զսպաշապիկի դեր ունի
Հիշեցնենք` նախկինում ՌԴ օրենսդրության պահանջով հայ արտահանողները չէին կարողանում իրենց ապրանքն անմիջապես հանձնել առևտրի կետերին, և ստիպված էին լինում աշխատել միջնորդ– մատակարարների միջոցով։
Հայաստանում այսօր անցկացվող համաժողովի ընթացքում նախատեսված են հանդիպումներ հայ գործարարների հետ, որի ընթացքում կքննարկեն ԵԱՏՄ շուկայում առկա խնդիրներն ու դրանց լուծման հնարավոր ուղիները։
Այդ նպատակով Երևանում գտնվող Մրցակցության ու հակամենաշնորհային կարգավորման հարցերով Եվրասիական տնտեսական հանձնաժողովի կոլեգիայի անդամ (նախարար) Սերիկ Ժումանգարինը համաժողովի բացմանը, լրագրողների հետ ճեպազրույցում հայտնեց, որ հանդիպումն այդ ձևաչափով արդեն 23-րդն է։
«Մենք այցելել ենք Բելառուսի մի շարք շրջաններ, Ղազախստան, Ղրղըզստան, հիմա` Հայաստան։ Մեր այցերի նպատակն է գործարարներից լսել նրանց խնդիրների, առկա խոչընդոտների և սահմանափակումների մասին։ Մենք այդ խնդիրները դիտարկում ենք Կոլեգիայի նիստում, և այն երկրների նկատմամբ, որոնք այդ խոչընդոտները ստեղծում են, ընդունում ենք համապատասխան որոշումներ»,– ասաց Ժումանգարինը։
Անարգել արտահանում. հայկական բաստուրման Ռուսաստան առաքելու սահմանափակումներ չկան
Մրցակցության ու հակամենաշնորհային կարգավորման հարցերով Եվրասիական տնտեսական հանձնաժողովի գոյության 5 տարիների ընթացքում, Սերիկ Ժումանգարինի խոսքով` նմանատիպ ավելի քան 50 խոչընդոտ է վերացվել։ Բայց, պարբերաբար առաջ են գալիս նոր խնդիրներ, օրենքներ են խախտվում, ինչը նրա դիտարկմամբ` զարգացման բնականոն ընթացք է, որն առկա է բոլոր միություններում։
Այս առումով էլ, Սերիկ Ժումանգարինի խոսքով` կարևոր է այսօր Հայաստանում ընթացող համաժողովը։
ՀՀ ՏՄՊՊՀ նախագահ Գեղամ Գևորգյանն էլ հայտնեց, որ գործարարների և ԵԱՏՄ հակամրցակցային մարմինների անմիջական շփումը միության շրջանակում նորաստեղծ ձևաչափ է։
«Այստեղ տնտեսվարող սուբյեկտներն անմիջապես կարողանում են հարցեր ուղղել մեր ԵԱՏՄ կոլեգաներին ու ստանալ իրենց պատասխանները մրցակցության ու այլ ոլորտների հետ կապված։ Եթե գործարարներն ունենում են խնդիրներ, հարցեր, ապա այդ հարցերը բարձրացնելու լավագույն տեղն այստեղ է»,– ասաց Գևորգյանը։
Նշենք, որ Հայաստանում այսօր մեկնարկող համաժողովի բացմանը մասնակցում են նաև ՀՀ կառավարության ներկայացուցիչներ` փոխվարչապետ Ավինյանի գլխավորությամբ։ Գործարարների հետ քննարկումը նախանշված է օրվա երկրորդ կեսին։
