ԵՐԵՎԱՆ, 2 հոկտեմբերի — Sputnik. Անաստասիա Զավորոտնյուկը հարցազրույց կտա դաշնային ալիքներից մեկին, որի ընթացքում կխոսի իր առողջական վիճակի մասին։ Այս մասին հայտնել է դերասանուհու համերգային տնօրեն Ստաս Խրիստովը, գրում է «Նորությունների դաշնային գործակալությունը»։
Խրիստովի խոսքով` հարցազրույցի օրն առայժմ որոշված չէ, սակայն պայմանավորվածությունն արդեն կա։
«Ես հարցազրույցի մասին պայմանավորվածություն ունեմ հեռուստաալիքի հետ», – հայտարարել է նա «Նորությունների դաշնային գործակալությանը»։
Դերասանուհու առողջական վիճակին վերաբերող հարցին օգնականը պատասխանել է. «Դա չեմ մեկնաբանում»։
Ավելի վաղ Խրիստովն ասել է, որ դերասանուհին պետք է հարցազրույց տար սեպտեմբերի վերջին` իր առողջական վիճակի մասին բամբասանքները և ենթադրությունները հանդարտեցնելու համար։ Սակայն արդեն հոկտեմբերն է, բայց Զավորոտնյուկը դեռ չի հայտնվել եթերում։
Ավելի վաղ հայտնել էին, որ Զավորոտնյուկի մոտ պոլիօրգան անբավարարություն և թոքաբորբ է զարգացել։ Նշվում էր նաև, որ բժիշկները դադարեցրել են կոմայի մեջ գտնվող դերասանուհու հակաուռուցքային բուժումը։ Սեպտեմբերի 13-ին հայտնի էր դարձել, որ դերասանուհին վերակենդանացման բաժանմունքում է` ծայրահեղ ծանր վիճակում։
ԶԼՄ–ների տվյալներով` 48-ամյա դերասանուհին և նրա ամուսինը, գեղասահորդ Պյոտր Չերնիշևը, հիվանդության մասին իմացել են մոտ մեկ տարի առաջ իրենց դստեր` Միլայի ծնվելուց հետո։ Ենթադրվում է, որ քաղցկեղային հիվանդությունը կարող էր արտամարմնային բեղմնավորման և ցողունային բջիջներով երիտասարդացման պրոցեդուրաների հետևանք լինել։
Հայտնում էին, որ դերասանուհին բուժում է ստացել Եվրոպայում, սակայն վերջերս Մոսկվա է վերադարձել։ Վերջին շրջանում «Իմ հրաշալի դայակը» սերիալի աստղը հազվադեպ էր ներկայանում հանրությանը, չեղարկել էր բոլոր ներկայացումները։ Նա նույնիսկ ներկա չի գտնվել իր ավագ դստեր խանութի բացմանը։
Զավորոտնյուկի հարազատները որևէ կերպ իրավիճակը չեն մեկնաբանում։ Չորս տարի առաջ քաղցկեղից մահացել էր Անաստասիայի հայրը։
