ԵՐԵՎԱՆ, 6 սեպտեմբերի — Sputnik. «Վարդան Հովսեփյան տրիոն» շուտով կլինի Երևանում: Այս մասին Sputnik Արմենիայի հետ զրույցում տեղեկացրեց հայտնի ջազմեն Արմեն (Չիկո) Թութունջյանի որդին՝ Հայկ Թութունջյանը:
Դեռևս 1992 թ.-ին Երևանի Կոմիտասի անվան պետական կոնսերվատորիայի սաներ Վարդան Հովսեփյանը (դաշնամուր), Կարեն Քոչարյանը (թմբուկ) և Արա Յարալյանը (կոնտրաբաս) Երևանում ստեղծեցին իրենց առաջին տրիոն՝ անսահման սիրահարված ժամանակակից ջազին:
Տղաները սկսեցին տարբեր ակումբներում ելույթներ ունենալ: Սակայն որոշ ժամանակ անց տրիոն կազմալուծվեց, քանի որ երիտասարդները հասկացան, որ ուզում են լուրջ հաջողություններ ունենալ ջազի ասպարեզում: Այդ պատճառով նրանք մեկնեցին արտերկիր՝ մասնագիտական ջազային կրթություն ստանալու նպատակով: Սկզբում տղաները հայտնվեցին Էստոնիայում, այնուհետև ճակատագրի բերումով՝ տարբեր երկրներում:
Տրիոյի մասնակիցներից յուրաքանչյուրն իրականացրեց իր երազանքը՝ ելույթներ ունենալով աշխարհի լավագույն երաժիշտների հետ, լավագույն բեմերում:
Նշենք, որ խմբի գեղարվեստական ղեկավար Վարդան Հովսեփյանը հինգ տարեկանից սկսել է դաշնամուր նվագել: 18 տարեկանում նա տեղափոխվել է Էստոնիա և ուսումը շարունակել Էստոնիայի երաժշտական ակադեմիայում: 1995թ.-ից տեղափոխվել է Ֆինլանդիա, որտեղ սովորել է Հելսինկիի ջազի կոնսերվատորիայում: Ճակատագրի բերումով հանդիպել է դաշնակահար և մանկավարժ Ֆրանկ Կարլբերգին, որը մեծ ճանապարհ է բացել տղայի համար դեպի ջազի մեծ աշխարհ՝ օգնելով նրան հասնել իր երազանքներին:
Մի քանի տարի անց Վարդանը հնարավորություն է ստացել սովորելու համաշխարհային ճանաչում ունեցող Բոստոնի Բերկլի երաժշտական քոլեջում, որն ավարտելուց հետո սկսել է դասավանդել և հանդես գալ և՛ որպես մենակատար, և՛ տարբեր խմբերում՝ Ջորջ Գարզոնի, Միկո Գուդրիկի, Տիմ Միլլերի և այլ ճանաչված երաժիշտների հետ: Վերջին տարիներին դաշնակահարը ձայնագրել և թողարկել է 5 ալբոմ:
Ամերիկացի հայտնի դաշնակահար Բրեդ Մելդաուն, լսելով Հովսեփյանի երաժշտությունը, հիացմունքով ասել է. «Նրա կոմպոզիտորական տաղանդն անկրկնելի է, իսկ նվագը՝ հիասքանչ»:
Թմբկահար Կարեն Քոչարյանը 8 տարեկանից զբաղվել է երաժշտությամբ՝ դասական թմբուկի դասարանում սովորելով հայ ջազի վարպետ Արմեն «Չիկո» Թութունջյանի մոտ:
1994 թվականին Կարենը տեղափոխվել է Էստոնիա, որտեղ ուսումը շարունակել է «Գեորգ Օտս» երաժշտական ուսումնարանում:
Այնտեղ նա ստեղծել է նոր խումբ՝ հին կազմով, անվանելով այն «Բժիշկ Մագնուս-Հայաստան»: Էստոնացիները մեծ ոգևորությամբ են ընդունում խմբին, քանի որ տղաները շատ պայծառ, արտահայտիչ ու եռանդուն էին: Տալինում տղաները հանդիպում են «էստոնական ջազի մոր»՝ Աննա Էրմի հետ, ով նրանց նկատում է և առնում իր հովանու տակ: Նրա օգնությամբ երիտասարդները կազմակերպում են համերգներ և տարբեր երաժշտական միջոցառումներ: Հաջող ելույթներից հետո Քոչարյանին նկատում է համաշխարհային ջազի աստղ, սաքսաֆոնահար Ջերիի Բերգոնզին, և նա սկսեց հրավիրել Կարենին իր հետ ելույթ ունենալու: 2007 թվականին Կարենը համերգներով եղել է Երևանում:
Կոնտրաբաս Արա Յարալյանն իր հիմնավոր երաժշտական կրթությունը ստացել է Էստոնիայի երաժշտության ակադեմիայում և դասավանդում է Տալինի «Գեորգ Օթսի» երաժշտական քոլեջում: Լինելով նաև կոմպոզիտոր, նա իր շուրջն է հավաքում տարբեր համույթներ: Յարալյանը համագործակցել է այնպիսի հայտնի երաժիշտների հետ, ինչպիսիք են Քարի Իկոնենը, Մարկի Օունասկարը, Անդրե Ֆերնանդեսը, Տատիանա Պարրան, Քրիստիան Ռանդալուն, Տաթևիկ Հովհաննիսյանը և ուրիշներ:
«Վարդան Հովսեփյան» տրիոյի երևանյան ելույթները կմեկնարկեն սեպտեմբերի 12-ին: Խումբը մենահամերգով հանդես կգա «Mezzo Classic House Club» ակումբում: Սեպտեմբերի 14-ին, 15-ին, 17-ին և 18-ին կլինեն նաև այլ համերգային ծրագրեր: Սեպտեմբերի 20-21-ը խումբը կմեկնի Մոսկվա, որտեղ ելույթ կունենա հայտնի «Էսսե ջազ» ակումբում:
