ԵՐԵՎԱՆ, 22 օգոստոսի — Sputnik. ՀՀ նախագահ Արմեն Սարգսյանը հետևողականորեն հանդես է գալիս այն քաղաքական որոշումների ընդունման օգտին, որոնք բխում են հայկական պետականության ամրապնդման և ազգային շահերից։ Այս մասին տեղեկանում ենք ՀՀ նախագահի աշխատակազմի Facebook սոցիալական ցանցի գրառումից։
«Թեև Սահմանադրությամբ նախագահն իրավասու չէ միջամտելու իշխանության մյուս մարմինների աշխատանքին, սակայն մշտապես պատրաստակամ է համազգային և համապետական կարևորություն ունեցող հարցերի դեպքում օգտակար լինել իր փորձառությամբ ու խորհուրդներով»,–նշված է հաղորդագրության մեջ։
Միևնույն ժամանակ նախագահի աշխատակազմը հիշեցնում է, որ վերջերս Լոռու մարզ այցելության ժամանակ, կարևորելով բնապահպանության խնդիրը, Հանրապետության նախագահը, մասնավորապես, նշել էր. «Հատուկ ջանքեր պետք է ներդնենք, որպեսզի բնությանը վնաս չտանք։ Պետք է հստակ ծրագիր ունենանք, թե ինչ ենք անում՝ և՛ բնապահպանության, և՛ տնտեսության, և՛ զարգացման, և՛ զբոսաշրջության ոլորտներում»։
Արմեն Սարգսյանը մեկնում է արձակուրդ. մի մասը նա կանցկացնի արտերկրում
Հիշեցնենք, որ ՀՀ վարչապետ Նիկոլ Փաշինյանը օգոստոսի 21–ին տեղեկացրել է, որ կառավարության աշխատակազմը «Էլարդի» եզրակացությունն ուղարկում է Շրջակա միջավայրի նախարարություն՝ պարզելու` արդյոք եզրակացության մեջ կան տվյալներ, որոնք Հայաստանի օրենսդրության համաձայն Ամուլսարի հանքի շահագործման համար շրջակա միջավայրի ազդեցության նոր գնահատում իրականացնելու անհրաժեշտություն են առաջացնում:
Մինչ այդ նա խորհրդակցություն է անցկացրել Ամուլսարի հարցով։
Օգոստոսի 19–ին Փաշինյանը հայտարարությամբ էր հանդես եկել` վստահեցնելով, որ Ամուլսարի հարցով կառավարության վրա արտաքին գործընկերների կողմից որևէ ճնշում չի գործադրվել։ Հակառակ դեպքում իշխանությունները փորձագիտության արդյունքներին մեկ տարուց ավել չէին սպասի։
Նույն օրը շուրջ 200 ցուցարար հավաքվել էր ՀՀ նախագահի նստավայրի մոտ (նախկինում եղել է ՀՀ վարչապետի նստավայրը)` պահանջելով դադարեցնել Ամուլսարի հանքի շահագործումը, ի հեճուկս մի քանի բնապահպանական փորձաքննությունների արդյունքների, որոնք իրականացրել են հրավիրված անկախ ընկերությունները։
Մինչ այդ ՀՀ Քննչական կոմիտեն նույնպես, Հատկապես կարևոր գործերի քննության գլխավոր վարչության քննիչ Յուրա Իվանյանի շուրթերով հաստատել էր, որ ըստ փորձաքննության արդյունքների՝ Ամուլսարի ոսկու հանքում արդյունահանումը շրջակա միջավայրի համար անկառավարելի ռիսկեր չի պարունակում։
