ԵՐԵՎԱՆ, 22 հուլիսի — Sputnik. Արցախում շփման գծի և հայ–ադրբեջանական սահմանի որոշ հատվածներում լարվածություն է նկատվում, բայց այն վերահսկելի է։ Այս մասին այսօր լրագրողների հետ զրույցում ասաց Հայաստանի պաշտպանության նախարար Դավիթ Տոնոյանը։
«Անհանգստանալու առիթ չկա։ Տարվում են ինժեներական աշխատանքներ, և երկու կողմից այդ աշխատանքները կանգնեցնելու փորձ է արվում», – նշեց նախարարը։
Անցած շաբաթ Հայաստանի պաշտպանության նախարարությունը հաղորդել էր, որ Ադրբեջանի կողմից կրակել են Վայոց Ձորի Ելփին գյուղի վրա։
Մեկնաբանելով այդ գնդակոծությունը` Տոնոյանն ասաց, որ դա նպատակային կրակոց չի եղել։ Ամեն դեպքում ձեռնարկվել են միջոցներ, այդ թվում` կապ է հաստատվել ադրբեջանական կողմի հետ` ապագայում նման միջադեպերը կանխելու համար։ Խոսքն օպերատիվ կապի մասին է, որի շուրջ պայմանավորվածություն է ձեռք բերվել անցած տարի Դուշանբեում Նիկոլ Փաշինյանի և Իլհամ Ալիևի հանդիպման ժամանակ։
Ժամանակին չկարողացանք պարզել հոգեվիճակը. Տոնոյանը` զինվորի ենթադրյալ ինքնասպանության մասին
Տոնոյանի խոսքով` օպերատիվ կապն այսպես է գործում. տեղի է ունենում միջադեպը, հայկական կողմը ստուգում է, այնուհետև նախազգուշացնում հակառակորդին, վերջինը միջոցներ է ձեռնարկում։ Նախարարն այդ գործընթացը դրական է գնահատում։
