ԵՐԵՎԱՆ, 9 Հուլիս — Sputnik. Երևանի ընդհանուր իրավասության դատարանը` դատավոր Մնացական Մարտիրոսյանի գլխավորությամբ, այսօր որոշում կայացրեց մերժել Մանվել Գրիգորյանի պաշտպան Լևոն Բաղդասարյանի հերթական միջնորդությունը ՝ իր պաշտպանյալին անհապաղ կալանքից ազատելու վերաբերյալ։
Պաշտպանը ներկայացրել էր ապացույցներ, այդ թվում Մանվել Գրիգորյանի հետազոտությունների վերաբերյալ փաստաթղթեր, որոնք ըստ նրա, փաստում են, որ անձի կյանքին վտանգ է սպառնում։ Պաշտպանը որպես այլընտրանքային խափանման միջոց առաջարկել էր մինչև 10 մլն դրամի չափով գրավը։
Նշենք, որ Մանվել Գրիգորյանն այսօր դատարան չէր ներկայացել:
Նախագահող դատավոր Մնացական Մարտիրոսյանը հրապարակեց «Նաիրի» ԲԿ-ից ստացված տեղեկանքը՝ համաձայն որի Մանվել Գրիգորյանը գտնվում է ստացիոնար բուժման մեջ և առողջական վիճակից ելնելով այսօրվա դատական նիստին չի կարող մասնակցել:
Հիշեցնենք, որ Երևանի ընդհանուր իրավասության դատարանը հուլիսի 2-ին որոշում էր կայացրել գեներալ Մանվել Գրիգորյանի նկատմամբ միջգերատեսչական հանձնաժողովային դատաբժշկական փորձաքննություն անցկացնելու մասին։
Մանվել Գրիգորյանը դատաբժշկական փորձաքննություն կանցնի. նրան հիվանդանոց տեղափոխեցին
Դատական նիստն ընդհատվել էր Գրիգորյանի առողջության կտրուկ վատանալու պատճառով։
Մանվել Գրիգորյանը մեղադրվում է 6 հոդվածով` ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակությունը կազմակերպելու մեջ:
Նրան մեղադրանք է առաջադրվել 2018 թ. հունիսի 19-ին։
