ԵՐԵՎԱՆ, 4 հուլիսի — Sputnik. ԱԺ նախկին պատգամավոր, ԵԿՄ նախկին նախագահ Մանվել Գրիգորյանին կալանքի տակ պահելը խոշտանգում է և հաշվեհարդար։ Այսօր լրագրողների հետ հանդիպմանը նման գնահատական տվեց Մանվել Գրիգորյանի փաստաբան Լևոն Բարսեղյանը։
Փաստաբանը չցանկացավ թվարկել, թե ինչ հիվանդություններ ունի Մանվել Գրիգորյանը, բայց նշեց, որ նա դժվարությամբ է տարբերում դեմքերն ու դեպքերը։
«Բժշկական կոնսիլիումը հաստատել է, որ անհրաժեշտ է Գրիգորյանին 24-ժամյա ռեժիմով արհեստական շնչառության սարքավորումներ միացնել։ Մտածելով, որ միգուցե նրա վիճակն այդքան էլ վատ չէ, այսպես ասած, հոսանքահարում են Գրիգորյանի ոտքերը և հասկանում են, որ 70-90%-ով չի զգում։ Դրանից հետո բժշկական կոնսիլիումը ցույց է տվել, որ նրա վիճակը գնալով վատանում է»,- ասաց փաստաբանը` հավելելով, որ Գրիգորյանն անդամալույծ է դարձել կալանքի պատճառով։
Բարսեղյանը հայտնեց, որ հուլիսի 3-ին դարձյալ դիմել են ՄԻԵԴ` այդ հարցին գնահատական տալու համար։
«Ամեն ինչ անցնելու է, բայց գնահատականներ տրվելու են»,- ասաց նա։
Հիշեցնենք` Երևանի ընդհանուր իրավասության դատարանը հուլիսի 2-ին որոշում էր կայացրել գեներալ Մանվել Գրիգորյանի նկատմամբ միջգերատեսչական հանձնաժողովային դատաբժշկական փորձաքննություն անցկացնելու մասին։
Դատական նիստն ընդհատվել էր Գրիգորյանի առողջության կտրուկ վատանալու պատճառով։
Մանվել Գրիգորյանը մեղադրվում է 6 հոդվածով` ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակությունը կազմակերպելու մեջ:
Նրան մեղադրանք է առաջադրվել 2018 թ. հունիսի 19-ին։
Մանվել Գրիգորյանի ոտքերը 50-70 տոկոսով չեն զգում. դատարանը գնաց որոշում կայացնելու
