ԵՐԵՎԱՆ, 2 հուլիսի — Sputnik. Ավստրալիայի Քվինսլենդ նահանգի Գոլդ–Քոսթ քաղաքում տեղի ունեցած ողբերգական հարսանիքը ցնցեց ամբողջ աշխարհի հազարավոր օգտատերերի. 22-ամյա երիտասարդը մահացավ հարսանիքի հաջորդ օրը, գրում է Daily Mirror–ը։
Նշվում է, որ արագ վատթարացող առողջական վիճակի հետ կապված Նավար Հերբերտն ընդամենը մի քանի ժամ ուներ, որպեսզի Աստծու առաջ ամուսնական կապով ամրապնդեր իր հարաբերությունները սիրելի աղջկա` Մայա Ֆալվասերի հետ։ Բանն այն է, որ բժիշկներն այլևս անզոր էին օգնել երիտասարդին, որը գլխուղեղի ուռուցք ուներ։ Գիտակցելով, որ այլևս փրկության հնարավորություն չկա` նա որոշեց հնարավորինս արագ ամուսնանալ իր սիրելիի հետ։
Արարողությունը տեղի է ունեցել գեղեցիկ այգում, և տոնախմբության հյուրերի խոսքով, չափազանց հուզումնալից էր, հիրավի` հոգեցունց։ Փեսայի ընկերները նրան բերեցին հաշմանդամի սայլակով, այնուհետև նա վերցրեց հարսի ձեռքը և նրան հավերժ սեր խոստացավ։ Հարսնացուն ծնկի եկավ, համբուրեց և գրկեց սիրելիին։ Հարսանյաց արարողությանը ներկա էր նաև նորապսակների որդին, որի 1 ամյակը լրանում է այսօր։
Ավելի ուշ հարսը Facebook–ի իր էջում լուսանկար էր հրապարակել, որին կից գրել էր. «Իմ սերն ընդմիշտ է, առողջության և հիվանդության ժամանակ»։
Նավար Հերբերտի վերջին ցանկությունն էր հանգչել հարազատ հողում` Նոր Զելանդիայում։ Այդ նպատակով GoFundMe հիմնադրամն էր բացվել, որի պետք է օգներ հուղարկավորման համար հանգանակություն հավաքել։ Հիմնադրամը 2 օրվա ընթացքում ավելի քան 80 հազար դոլար էր հավաքել։ Հազարավոր ֆունտ նվիրատվություն էր արվել անծանոթ մարդկանց կողմից, որոնցից ոմանք մեկնաբանություններում ցավակցել էին և կարեկցանքի անկեղծ խոսքեր էին գրել։
