ԵՐԵՒԱՆ, 21 յունիսի — Sputnik. ՀՀ իշխանութիւնը շուկայականին կը մօտեցնեն հողի եւ անշարժ գոյքի կալուածագրային արժէքները: «Անշարժ գոյքի հարկման նպատակով շուկայական գնահատման կարգը սահմանելու մասին» օրինագիծը հաւանութեան արժանացաւ ՀՀ կառավարութեան այսօրուան նիստին եւ ուղարկուեցաւ ԱԺ:
Կառավարութեան առընթեր անշարժ գոյքի կալուածագիրի պետական կոմիտէի պետ Սարհատ Պետրոսեան յայտնեց, որ անշարժ գոյքի կալուածագրային արժէքները կը փոփոխուին, իսկ տարածքային գօտիները, որոնցմէ կախուած է կալուածագրային արժէքը, կը վերանայուին եւ՛ Երեւանի, եւ՛ մարզերու մէջ:
Գիները կը գրանցուին Կալուածագիրի պետական կոմիտէին մէջ, ատոնց հիման վրայ ալ կը հաշուարկուին հողի եւ գոյքի հարկերը: Այսուհետ կը նախատեսուի իւրաքանչիւր երեք տարին անգամ մը վերանայիլ գիները:
Նախարարն ընդգծեց, որ խօսքը հողի հարկի եւ գոյքահարկի բարձրացման մասին չէ, քանի որ այդ հարցը ֆինանսներու նախարարութեան իրաւասութեան տակ է, եւ նման նախաձեռնութեամբ կրնայ հանդէս գալ միայն ինքը:
«Մենք կը վերանայինք կալուածագրային արժէքները, որպէսզի ատոնք աւելի շատ համապատասխանեն շուկայականին: Իսկ այդ հիմքով հարկերը փոխելու հարցն արդէն մենք չենք որոշեր: Սակայն հանրապետութեան մէջ պէտք է անշարժ գոյքի առարկայական գնահատում ըլլայ: Ներառեալ հարկերու համար, բայց ոչ միայն: Օրինակ` աւելի հեշտ պիտի ըլլայ մեկնարկային գիները որոշել պետական աճուրդներուն», – աւելցուց Պետրոսեան:
Ան ընդգծեց, որ հողի եւ անշարժ գոյքի կալուածագրային արժէքը ամենուրէք չաճիր: Հանրութեան շրջանին արդէն լուրեր կը պտըտին, որ ստիպուած պիտի ըլլան տարեկան 700 հազար դրամի հարկ վճարել 1 քմ–ի դիմաց:
«Կ’ուզեմ ընդգծել` նման հարկ կ’ըլլայ միայն Երեւանի փոքր կեդրոնի բնակարաններուն համար, ընդ որում ոչ ամէն տեղ, այլ ամենաժամանակակից շէնքերուն մէջ, օրինակ` մենաքար նորակառոյց շէնքերուն», – աւելցուց կալուածագիրի պետը:
Ֆինանսներու նախարարութիւնը կալուածագրային նոր արժէքի հիման վրայ կը քննարկէ հողի եւ գոյքի հարկը փոխելու հարցը: Այսօր ֆինանսներու նախարարութիւնը հակուած է բարձրացնելու գիները, քանի որ Հարկային օրէնսգիրքի տրամաբանութիւնը հետեւեալն է` հարկերը նուազեցնել արտադրութեան եւ բարձրացնել սպառման համար (յատկապէս թանկարժէք գոյքի եւ ոչ առաջնային անհրաժեշտութեան ապրանքներու):
Այդ պատճառով թանկարժէք անշարժ գոյքի հարկերու բարձրացման հնարաւորութիւնը մանրամասն կը քննարկուի, որմէ յետոյ աշնան կը ներկայացուի ԱԺ: Կ’ենթադրուի, որ օրինագիծը պէտք է ընդունուի մինչեւ 2019 թուականի աւարտը, որպէսզի փոփոխութիւններն ուժի մէջ մտնեն արդէն 2020 թուականէն Հարկային օրէնսգիրքի միւս փոփոխութիւններուն հետ մէկտեղ:
