ԵՐԵՎԱՆ, 14 հունիսի — Sputnik. Երեկ Հրազդան քաղաքում տեղի ունեցած վրաերթի հետևանքով հիվանդանոց տեղափոխված տղամարդկանցից մեկը մահացել է։
Ավելի վաղ տեղեկացրել էինք, որ Հրազդանում վրաերթի հետևանքով մի տղամարդ տեղում մահացել էր, մյուսին տեղափոխել էին հիվանդանոց։
Sputnik Արմենիայի տեղեկություններով` իրավապահները պարզել են վրաերթի ենթարկված տղամարդկանց ինքնությունը. երկուսն էլ Հրազդանի բնակիչ են։
Տեղում մահացածը 1940 թվականին ծնված Սերյոժա Ջառահյանն էր։ Նրա հետ փողոցը հատած մյուս տղամարդը՝ 75-ամյա Սիմոն Պողոսյանը, որն անգիտակից տեղափոխվել էր «Հրազդան» բժշկական կենտրոն, որտեղից էլ մայրաքաղաք՝ «Էրեբունի» բժշկական կենտրոն։
Բժիշկները մի քանի ժամ պայքարել են նրա կյանքի համար, բայց ապարդյուն։ Ժամը 19-ն անց 20-ի սահմաններում՝ դեպքից մոտ 7 ժամ անց, մահացել է նաև Սիմոն Պողոսյանը՝ այդպես էլ գիտակցության չգալով։
