ԵՐԵՎԱՆ, 28 մայիսի — Sputnik. Դատական համակարգի հետ կապված մենք շատ անելիքներ ունենք։ Այսօր լրագրողների հետ զրույցում ասաց ՀՀ փոխվարչապետ Տիգրան Ավինյանը` հավելելով, որ հայ հասարակությունը բավարար վստահություն չունի դատարանների ու դատավորների նկատմամբ։
Պատասխանելով ԲԴԽ նախագահ Գագիկ Հարությունյանի հրաժարականի մասին հարցին` Ավինյանն ասաց. «Ես կարծում եմ` մեկ –երկու անձի հրաժարականը համակարգային բարեփոխումներ չի բերում»։
Դատական համակարգի բարեփոխումները, Ավինյանի խոսքով, ոչ միայն գործադիր իշխանության, այլև հասարակության կարևորագույն խնդիրներից մեկն է ու համակարգի կայացման անհրաժեշտ նախապայմանը։
Երևանի ընդհանուր իրավասությունների Ավան և Նոր Նորք վարչական շրջանների դատարանը՝ դատավոր Դավիթ Գրիգորյանի նախագահությամբ, մայիսի 17–ին որոշեց ՀՀ երկրորդ նախագահ Ռոբերտ Քոչարյանին անձնական երաշխավորությամբ ազատ արձակել։
Դրանից հետո մայիսի 19–ին Նիկոլ Փաշինյանը ժողովրդին կոչ արեց մայիսի 20–ի առավոտյան փակել հանրապետության բոլոր դատարանների մուտքերը։ Ապա հանդես եկավ հայտարարությամբ, որտեղ նշեց, որ Հայաստանում հեղափոխությունը պետք է իր ավարտին մոտեցնել և բարեփոխել դատական համակարգը։
Նիկոլ Փաշինյանը Facebook–ի իր էջում ուղիղ եթերի ժամանակ ասել էր, որ դատական համակարգում «վիրահատական միջամտության» ժամանակն է։ Այդ գործընթացը պետք է արտահայտվի հետևյալ կերպ` Հայաստանի բոլոր դատավորները «վեթինգի» կենթարկվեն։
Մայիսի 24-ին ԲԴԽ նախագահ Գագիկ Հարությունյանը հրաժարական տվեց։
