ԵՐԵՎԱՆ, 28 մայիսի — Sputnik. Եթե անհրաժեշտություն լինի, բոլորն էլ պետք է վեթինգի ենթարկվեն, այդ թվում Ազգային անվտանգության ծառայությունն ու ծառայության ղեկավարը։ Լրագրողների հետ զրույցում նման կարծիք հայտնեց ԱԱԾ տնօրեն Արթուր Վանեցյանը։
«Այո, բոլորն էլ անհրաժեշտության դեպքում պետք է վեթինգի ենթարկվեն»,–ասաց նա։
Հարցին, թե Վանեցյանը նախկին իշխանությունների հետ կապեր ունի և արդյո՞ք մտավախություն չունի, որ վեթինգի արդյունքում դրանք «ջրի երես» դուրս կգան` Վանեցյանը պատասխանեց, թե ոչ, չկա մտավախություն.«Այդ ի՞նչ կապեր ունեմ, որ մինչև հիմա ջրի երես դուրս չեն եկել»։
Հիշեցնենք` մայիսի 19–ի ուշ երեկոյան Նիկոլ Փաշինյանը ժողովրդին կոչ արեց մայիսի 20–ի վաղ առավոտից փակել հանրապետության բոլոր դատարանների մուտքերը։ Իսկ կեսօրին հանդես եկավ հայտարարությամբ` նշելով, որ Հայաստանում հեղափոխությունը պետք է իր ավարտին հասնի դատական համակարգի բարեփոխմամբ։ Վարչապետը հայտարարեց, որ բոլոր դատավորների նկատմամբ պետք է «վեթինգ» իրականացվի։
