ԵՐԵՎԱՆ, 23 մայիսի — Sputnik. Չինական ընկերությունը հետաքրքրված է Հայաստանում բազալտե մանրաթելերի արտադրությամբ։ Այս մասին այսօր ՀՀ կառավարության նիստում հայտարարեց քաղաքաշինության կոմիտեի նախագահ Վահագն Վերմիշյանը։
Օրեր առաջ նա հանդիպում է ունեցել TEDA չինական հոլդինգի ներկայացուցիչների հետ, որոնք հայտարարել են արտադրության մեջ մի քանի տասնյակ միլիոն դոլարի ներդրում անելու հնարավորության մասին։
«Նրանք շատ ոգևորված են Չինաստանի ղեկավարության հետ Հայաստանի վարչապետի հանդիպումից և տրամադրված են աշխատելու մեր երկրում», – ավելացրեց Վերմիշյանը։
Նշենք, որ Հայաստանում արդեն նման արտադրություն գործում է, որը ներդրողներ է փնտրում։
Բազալտե մանրաթելը շինարարության համար նախատեսված ջերմամեկուսիչ հեռանկարային նյութ է, որը տարբերվում է իր թեթևությամբ, ամրությամբ և մեկուսացումով: Հայաստանը բազալտի զգալի պաշարներ ունի երկրի տարբեր շրջաններում:
Հիշեցնենք, որ ՀՀ վարչապետ Նիկոլ Փաշինյանը Չինաստան էր այցելել պաշտոնական այցով մայիսի 14-16-ը։ Նա հանդիպում է անցկացրել ՉԺՀ նախագահ Սի Ցզինպինի և վարչապետ Լի Կեցյանի հետ, իսկ մայիսի 15-ին ելույթ ունեցել «Ասիական քաղաքակրթությունների երկխոսություն» համաժողովին։
