ԵՐԵՎԱՆ, 21 Ապրիլ — Sputnik. Վարչապետ Նիկոլ Փաշինյանը ցավակցական հեռագիր է հղել Շրի Լանկայի ժողովրդավարական սոցիալիստական Հանրապետության նախագահ Մաիտրիպալա Սիրիսենային:
Սուրբ Զատկի տոնակատարությունների ժամանակ, հիշեցնենք, այսօր՝ ապրիլի 21-ին երկրում տեղի են ունեցել 8 ահաբեկչական գործողություններ, որոնց զոհ է գնացել վերջին տվյալներով 207 մարդ, վիրավոր են 450-ը։
«Խորին ցավակցություն եմ հայտնում Ձեզ և Շրի Լանկայի բարեկամ ժողովրդին՝ Սուրբ Զատկի տոնակատարությունների ժամանակ տեղի ունեցած սահմռկեցուցիչ ահաբեկչական գործողությունների կապակցությամբ, որոնք հարյուրավոր անմեղ զոհերի և վիրավորների պատճառ դարձան»,- գրված է ՀՀ վարչապետի հղած ցավակցականում:
Հայաստանի Հանրապետությունը խստորեն դատապարտում է այդ սարսափելի ոճրագործությունները և վերահաստատում իր հանձնառությունը՝ միջազգային հանրության հետ համատեղ պայքարելու մեր օրերում ահագնացող այդ չարիքի դեմ:
Վարչապետը Շրի Լանկայի համար այս դժվարին պահին խորին ցավակցությունն է հայտնել երկրի նախագահին և զոհվածների ընտանիքներին՝ մաղթելով ուժ և տոկունություն, իսկ վիրավորներին՝ շուտափույթ ապաքինում:
Շրի Լանկայի Ժողովրդավարական Սոցիալիստական Հանրապետության նախագահ Մաիտրիպալա Սիրիսենային ցավակցական հեռագիր է հղել նաև Հայաստանի Հանրապետության նախագահ Արմեն Սարգսյանը:
ՀՀ նախագահի աշխատակազմի հասարակայնության հետ կապերի վարչությունից տեղեկացնում են, որ Արմեն Սարգսյանը զոհվածների հարազատներին ու մերձավորներին մաղթել է տոկունություն և ոգու արիություն, իսկ տուժածներին` շուտափույթ ապաքինում:
