ԵՐԵՎԱՆ, 15 մարտի — Sputnik. Թիվ 2 տարածաշրջանային քոլեջի ուսանողադասախոսական ամբողջ կազմն այսօր շարունակում է գործադուլ–դասադուլը։ Այս մասին Sputnik Արմենիայի հետ զրույցում նշեց քոլեջի փոխտնօրեն Մարինա Մադոյանը։
Նա տեղեկացրեց, որ չնայած բոլորը եկել են աշխատանքի և դասի, բայց այս պահին դասապրոցես չի ընթանում։ «Երեկ ԿԳ փոխնախարար Գրիշա Թամրազյանը մեզ հորդորեց դադարեցնել մեր` կառավարության մոտ իրականացրած բողոքի ակցիան ու վերադառնալ քոլեջ։ Մենք էլ համաձայնեցինք մեկ պայմանով, որ այսօր կրթության և գիտության նախարարը պետք է այցելի քոլեջ ու լսի մեջ։ Հիմա բոլորս նստած ենք դասարաններում, բայց դաս չենք անում, սպասում ենք նախարարի այցին»,–ասաց Մադոյանը։
Նա նշեց նաև, որ իրենք շարունակելու են գործադուլը, քանի որ պահանջում են հենց նախարարի հետ հանդիպում, որպեսզի քննարկեն քոլեջի տնօրենի` Կառլեն Հայրապետյանի` աշխատանքից ազատման հիմքերը։
Մադոյանը պնդեց, որ քոլեջի տնօրենին անհիմն են հեռացրել աշխատանքից և այս ամենի պատճառը մեկն է` նոր մարդու են ուզում տնօրեն նշանակել։ «Ճշմարտությունն ի վերջո պետք է հաղթի, չէ՞։ Չի կարող մարդն ուղղակի ազատվել աշխատանքից»,–ասաց Մադոյանը։
Նա հավելեց նաև, որ եթե այսօր ԿԳ նախարար Արայիկ Հարությունյանը չայցելի իրենց, երկուշաբթի օրվանից կվերսկսեն բողոքի ակցիաները։
Քոլեջից քիչ առաջ տեղեկացրեցին նաև, որ ԿԳ փոխնախարար Գրիշա Թամրազյանը և նախնական և միջին մասնագիտական կրթության վարչության պետ Արտակ Աղբալյանն այցելել են քոլեջ։ Մանրամասները կներկայացնենք հաջորդիվ։
Հիշեցնենք, որ երեկ` մարտի 14–ին, թիվ 2 տարածաշրջանային քոլեջի ուսանողադասախոսական ամբողջ կազմը կառավարության նիստի ընթացքում հավաքվել էր կառավարության շենքի դիմաց` հանդիպում պահանջելով կրթության ու գիտության նախարար Արայիկ Հարությունյանի հետ։ Խնդիրն այն է, որ երեկ առավոտյան աշխատանքից ազատվել է թիվ 2 տարածաշրջանային քոլեջի տնօրեն Կառլեն Հայրապետյանը։
Տեղում էին նաև ԿԳ ներկայացուցիչները. նախնական և միջին մասնագիտական կրթության վարչության պետ Արտակ Աղբալյանը լրագրողների հետ զրույցում նշեց, որ տնօրենը մեկ տարվա ընթացքում 2 խիստ նկատողություն է ստացել։ «Առաջին նկատողությունը ներքին աուդիտի ուսումնասիրման արդյունքում է ստացել, իսկ երկրորդն օրերս է ստացել` 2018–ի դեկտեմբեր և 2019–ի հունվար ամիսներին տեսչական մարմնի ստուգումների արդյունքում»,–ասել էր Աղբալյանը։ Նա շատ մանրամասներ չէր հայտնել, ուղղակի հավելել էր, որ, օրինակ, քոլեջում կան գրանցված ուսուցիչներ, որոնք մասնագիտորեն չեն համապատասխանում իրենց հաստիքին։ Բացի այդ, ֆինանսական ինչ–ինչ անճշտություններ են հայտնաբերվել։
