Տույժերի հաշվարկումը իրականանում է չկատարված պարտավորության դիմաց ՝ յուրաքանչյուր օրվա համար 0.075 տոկոսի չափով : Բազմաթիվ են ՊԵԿ-ին ուղղված դիմումները , որ հարկ վճարողը կատարել է վճարում միասնական հաշվին ,սակայն, գումարը չի հաշվեգրվել : Դեպքերի ու պատճառների մասին Sputnik Արմենիայի եթերում խոսել է ՊԵԿ կազմակերպման և հսկողության վարչության եկամուտների հաշվառման բաժնի պետ Զառա Մելքումովան:
Հիմնականում վճարման հանձնարարականում հարկ վճարողի կողմից չի նշվում 8-անիշ համարը ՝ ՀՎՀ –ն: Հարկ վճարողը պարտավոր է իր 8 -անիշ համարը ճիշտ նշել վճարողի դաշտում, որովհետև վճարման նույնականացումը կատարվում է հենց այդ հաշվեհամարով: Այսինքն, եթե հարկ վճարողը օրինակ՝ չի նշում իր ՀՎՀ –ն ,կամ նշում է սխալ տեղում, կամ նշում է մեկ այլ անձի ՀՎՀ ՝ այդ դեպքում գումարը չի հաշվեգրվում միասնական հաշվին :
«Սրանք առօրյա հանդիպող դեպքերից են, և հարկ վճարողները հաճախ դիմում են ՊԵԿ ՝ իրենց կողմից փոխանցված գումարները միասնական հաշվին հաշվեգրելու խնդրանքով : Սակայն, այդ իրավասությունը ՊԵԿ –ինը չէ, այլ ֆինանսների նախարարությանը»,-ասում է Մելքումովան:
Պրակտիկորեն հնարավոր է վերադարձնել սխալ փոխանցված գումարները, եթե հարկ վճարողը դիմի ֆինանսների նախարություն: Իհարկե, ոչ միայն հարկ վճարողների մեղքով է, որ սխալ փոխանցումներ են տեղի ունենում: Շատ անգամ բանկերի աշխատակիցները ևս սխալ դաշտում են նշում կատարում, որի հետևանքով գումարը չի հաշվեգրվում: Ներկայումս, սակայն, հարկ վճարողները ունեն հնարավորություն իրենց հաշվետվությունների ներկայացման էլեկտրոնային համակարգում տեսնել միասնական հաշվի մնացորդը: Խորհուրդ է տրվում գումար փոխանցելիս անմիջապես ստուգել ՝ արդյոք գումարը հաշվեգրվել է միասնական հաշվին թե ոչ: Հակառակ դեպքում , հարկային մարմինը ստիպված է իրականացնել իր գործառույթը՝ հարկ վճարողի չկատարած պարտավորության նկատմամբ հաշվարկելով տույժերը:
