ԵՐԵՎԱՆ, 7 հունվարի — Sputnik, Արմենուհի Մխոյան. Ուժեղացված հերթապահությամբ ու լրացուցիչ բրիգադով՝ ամանորյա օրերին Գյումրու շտապ բուժօգնության կայանը կանչերի ավելացում է ունեցել:
Այս տարի, նախորդ տարվա նույն ժամանակահատվածի համեմատ, Գյումրիում կանչերի աճ է գրանցվել: Այս մասին տեղեկացրեց Գյումրու Շտապ բժշկական օգնության կայանի գլխավոր բուժքույր Հռիփսիմե Մելիքսեթյանը՝ փաստելով, որ միջինը ավելացել է 20-30 կանչով: «Նախորդ օրերին եղել է միջինը 80-85 կանչ, բայց հունվարի 6-ին գրանցվել է 122 կանչ, թեև այս կանչերը կապ չունեն տոնական օրերի հետ՝ չեն արձանագրվել սննդային թունավորման, կամ աղիքային ինֆեկցիայի դեպքեր, այլ հիմնականում այս ժամանակահատվածին հատուկ խրոնիկ հիվանդությունների սրացում է եղել»,-նշեց Հռիփսիմե Մելիքսեթյանը:
Այս տարի չեն գրանցվել նաև ալկոհոլային թունավորման դեպքեր: Հիմնականում գրանցվել են հիպերտոնիկ կրիզներ, սրտային կամ բրոնխիալ ասթմայի, նևրոզի դեպքեր: Անցած օրերին արձանագրվել են նաև կենցաղային և ՃՏՊ հետևանքով տրավմաներ, շմոլ գազի թունավորման դեպքեր:
«Շմոլ գազի թունավորման 6 հիվանդ ունեցել ենք դեկտեմբերի 30-ին, իսկ հունվարի 5-ին՝ 5 հիվանդ. բարեբախտաբար զոհեր չեն եղել»,-պատմեց Հռիփսիմե Մելիքսեթյանը:
Հերթապահ բրիգադները նոր տարին դիմավորում են լավագույն դեպքում կայանում, իսկ վատագույն դեպքում՝ հիվանդի տանը կամ ճանապարհին: «Եթե հաջողվում է ու 12-ը խփելուն պես կայանում ենք, ապա անպայման բաժակ ենք բարձրացնում տեղում ու միմյանց Նոր տարին շնորհավորում: Ի դեպ, արդեն տոնական օրերն անցել են, բայց մինչև օրս էլ, երբ կանչ է գրանցվում, զանգահարողն առաջինը հեռախոսավարի Նոր տարին է շնորհավորում, ապա նոր իր դարդերը ներկայացնում»,-նշեց Հռիփսիմե Մելիքսեթյանը:
Ուժեղացված գրաֆիկով աշխատել են նաև փրկարարները: Տոնական օրերին մարզի փրկարարները արձագանքել են 13 դեպքի: Անցած տարի 10 դեպք էր արձանագրվել: Գրանցվել է 2 զոհ, 10 տուժած՝ 2018 թվականի նույն ժամանակահատվածի 8 տուժածի փոխարեն: Մահվան ելքով և վիրավորներով դեպքերի մեծ մասն արձանագրվել է ճանապարհատրանսպորտային պատահարների հետևանքով:
«Անցած տարի զոհեր չէինք ունեցել, իսկ այս տարի 2 զոհ ու 5 տուժած հենց ճանապարհատրանսպորտային պատահարի հետևանքով ունեցանք: Ավելացել են նաև հրդեհի և շմոլ գազի թունավորման դեպքերը, բարեբախտաբար առանց զոհերի»:
Մնացած դեպքերը կենցաղային կանչեր են եղել»,-Sputnik Արմենիային տեղեկացրեց ՀՀ ԱԻ Շիրակի մարզի փրկարարական վարչության ճգնաժամային կառավարման կենտրոնի պետ, փրկարար ծառայության փոխգնդապետ Մարտին Մկոյանը: Ամանորի օրերին հիմնականում զանգահարողները ցանկացել են տեղեկանալ ճանապարհների վիճակից: Անակնկալ կամ հումորային զանգեր շիրակցի փրկարարները չեն ստացել. ասում են՝ Շիրակի բնակիչները փրկարարներին լուրջ են մոտենում:
Ի դեպ, այս օրերին փակ, կամ անանցանելի ճանապարհ չի եղել, բացառությամբ որոշ միջհամայնքային դժվարանցանելի ճանապարհների: «Այս պահին էլ վիճակը նորմալ ու վերահսկելի է»,-նշեց պատասխանատուն՝ հավելելով, որ ինքը հերթապահություն ունեցել է հունվարի 2-ին: Տոնական օրերը փրկարարի համար սովորականից չեն տարբերվում՝ իրենք միշտ զգոն ու պատրաստ են:
