ԵՐԵՎԱՆ, 18 դեկտեմբերի — Sputnik. Հեռուստամեկնաբան Պետրոս Ղազարյանը Հանրային հեռուստաընկերության լրատվական բաժնի տնօրենի ժամանակավոր պաշտոնակատարն է։ Այս մասին Sputnik Արմենիային հայտնեցին Հանրային հեռուստաընկերությունից` հավելելով, որ այդ պաշտոնում նրա նշանակման որոշում դեռ չի կայացվել։
Պետրոս Ղազարյանը Հանրային հեռուստաընկերությունում աշխատանքի էր անցել նոյեմբերին։ Նրա առաջին հաղորդումը` հարցազրույցի ժանրով, Հ1-ով եթեր էր հեռարձակվել նոյեմբերի 20-ին։
Ավելի ուշ Պետրոս Ղազարյանը փոխարինել էր «Իմ քայլը» դաշինքի համամասնական ցուցակով ԱԺ պատգամավորի թեկնածու առաջադրված Հանրային հեռուստաընկերության լրատվական բաժնի տնօրեն Վահագն Թևոսյանին, ով ընտրությունների արդյունքում պատգամավորական մանդատ է ստացել ու ազատվել Հ1–ում զբաղեցրած պաշտոնից։
Հիշեցնենք, մինչ այդ Հանրային հեռուստաընկերության լրատվական- քաղաքական հաղորդումների տնօրենի պաշտոնը զբաղեցնում էր Հարություն Հարությունյանը, ով թավշյա հեղափոխությունից հետո` հունիսի 19-ին, ազատման դիմում էր ներկայացրել։
