ԵՐԵՎԱՆ, 3 դեկտեմբերի — Sputnik. Իրականությանը չի համապատասխանում տեղեկությունն այն մասին, թե 102-րդ ռուսական ռազմակայանի պայմանագրային զինծառայողը ծեծել է Գյումրու բնակչուհուն, որը մարմնական վնասվածքներից հետո տեղում մահացել է։ Sputnik Արմենիային այս մասին հայտնեցին Հայաստանում Ռուսաստանի դեսպանատան մամուլի ծառայությունից։
Ավելի վաղ հայկական որոշ լրատվամիջոցներ գրել էին, որ Գյումրիում 57-ամյա կնոջ սպանության հետ առնչություն ունի ռազմակայանի պայմանագրային զինծառայողներից մեկը։ Նրան բերման են ենթարկել Գյումրու ոստիկանության աշխատակիցները։
Հայաստանում Ռուսաստանի դեսպանատան տվյալների համաձայն` դեկտեմբերի 3-ին նա ծառայության դուրս չի եկել։ Նման դեպքերում, փոխգործակցության կանոնակարգի համաձայն, ռուս զինվորականներն այդ մասին պետք է տեղեկացնեն տեղի ինքնակառավարման մարմիններին։ Զինծառայողի մասին տեղեկությունը հայտնվել է հետախուզական ամփոփագրում, ինչը պատճառ է դարձել, որ նրան ընդգրկեն այդ աղմկահարույց իրադարձության հետ առնչություն ունեցողների շրջանակում։
Ավելի ուշ զորամասի հրամանատարությունը Գյումրիում ՌԴ գլխավոր հյուպատոսություն ներկայացուցիչների և ՀՀ ոստիկանության հետ համատեղ պարզել է, որ ռուս զինծառայողն առնչություն չունի այդ դեպքի հետ։
