ԵՐԵՎԱՆ, 22 նոյեմբերի — Sputnik. ՀՀ վարչապետի պաշտոնակատար Նիկոլ Փաշինյանը խոստացել էր, որ հայկական ընկերությունները, որոնք բարեխիղճ կվճարեն հարկերը, խնդիրների չեն բախվի, ասաց Եվրասիական Զարգացման Բանկի ղեկավար Անդրեյ Բելյանինովը` մեկնաբանելով նախկին իշխանությունների հետ սերտ կապ ունեցող ընկերություններին բանկի կողմից վարկ տրամադրելու վերաբերյալ նոր իշխանությունների վերաբերմունքը: Այս մասին տեղեկացնում է Sputnik Արմենիայի թղթակիցը։
«Սա այն դեպքն է, երբ տնտեսությունը քաղաքականությունից դուրս է։ Քաղաքական գործիչները գալիս ու գնում են։ Ժողովուրդները, տնտեսությունները մնում են։ Հայաստանի տնտեսությունը այդքան մեծ չէ, որ առանցքային ընկերությունները տնտեսական շրջանառությունից անջատենք», – ասաց Բելյանինովը։
Նա հույս հայտնեց, որ բոլոր մշակումները կիրականացվեն, սակայն նախագծերը «ճշտվում» են մինչ օրս։ Որոշակի խնդիրներ են առաջացել Երևանի քաղաքապետարանի հետ, ինչպես նաև այն հանգամանքի, որ Վերակառուցման և զարգացման եվրոպական բանկը «Հայաստանի էլցանցերը» նախագիծ չէին թողնում, պարզաբանեց ԵԱԶԲ–ի ղեկավարը։
Հայաստանում ներքաղաքական իրավիճակը, դա նրա ներքին գործն է, նույնպես ընդգծեց Բելյանինովը, հայտնելով, որ ավելի վաղ հանդիպում է ունեցել Փաշինյանի հետ։
«Եթե փոխանցեմ նրա խոսքերը, ապա կհնչի հետևյալ կերպ` «վճարել ես հարկերդ, հանգիստ քնիր» (ինչպես ռուսական գովազդում – խմբ.)։ Ընկերությունները, որոնք իրենց բարեխիղճ են դրսևորում, այսինքն՝ որոնք վճարում են բոլոր հարկերը և որոնց նկատմամբ որևէ պահանջ չկա (առավել ևս հարկերի չվճարման հետ կապված խնդիրներ), բիզնեսի բացարձակ լիիրավ մասնակիցներ են», – նշեց ԵԱԶԲ–ի ղեկավարը։
Նա ուշադրություն հրավիրեց այն հանգամանքին, որ բոլոր երեք ընկերությունները իրենց ոլորտներում առաջատար դիրքեր են զբաղեցնում։ Բացի այդ, բանկը նրանց հետ աշխատել է շուրջ մեկ տարի, նրա համար դա «շուկայի մի մաս է», իսկ բուն նախագծերը Բելյանինովը բնութագրել է որպես «լավ և պատրաստի»։
«ԵԱԶԲ–ն միակը չէ նման իրավիճակում։ Լավատեսորեն եմ տրամադրված», – ասաց Բելյանինովը։
Եվրասիական բանկը մտադիր է Հայաստանում 240 մլն դոլար ներդրում անել։ Նախապատրաստվող նախագծերի պորտֆելը դիվերսիֆիկացվել է Հայաստանի համար առաջնային ոլորտներով. գյուղատնտեսություն, էլեկտրաէներգետիկա, հեռուստահաղորդակցման տեխնոլոգիաներ, միկրո` ՓՄՁ (տեղական ֆինանսական ինստիտուտների` միջնորդների միջոցով)։
Առաջին նախագիծը վերաբերում է` «Արմսանպրոդակտ» ՍՊԸ–ի հետ համատեղ իրականացվող ջերմոցային համալիրի կառուցմանը։
Նախագծին խորհրդատվական և տեխնիկական աջակցություն է ցուցաբերում «Սպայկա» (առաջատար ագրարաառևտրային ընկերություն և Հայաստանից գյուղմթերքի խոշորագույն արտահանող) ընկերությունը։
Երկրորդ նախագիծը` «Հայաստանի էլցանցեր» ՓԲԸ–ի վարկային պորտֆելի օպտիմիզացիան և ներդրումային ծրագրի ֆինանսավորումն է։ ԵԱԶԲ–ի ֆինանսավորումը մինչև 60 մլն դոլար կկազմի։
Երրորդ խոշոր նախագիծը կապված է Ucom բջջային օպերատորի ներդրումային ծրագրի ֆինանսավորման հետ։ ԵԱԶԲ–ի վարկային լիմիտը կազմում է 100 մլն դոլար։
«Սպայկա» ընկերությունը մասնավոր զրույցներում կապում են Սերժ Սարգսյանի փեսա Միքայել Մինասյանի անվան հետ։ Միլիարդատեր Սամվել Կարապետյանին պատկանող «Տաշիր գրուպ» ընկերությունը 2015 թվականից «Հայաստանի էլցանցեր» ՓԲԸ–ի 100% սեփականատերն է։ Ucom ընկերությունն էլ կապում են ՀՀ ՊԵԿ նախկին պետ և ֆինանսների նախարար Գագիկ Խաչատրյանի անվան հետ։
