ԵՐԵՎԱՆ, 16 նոյեմբերի — Sputnik. Փորձարկումները ցույց են տալիս. Հայաստանում բավարար հողմային ռեսուրս կա հզոր էլեկտրակայան կառուցելու համար։ Այս մասին Sputnik Արմենիային ասաց Acciona Energia իսպանական ընկերության մենեջեր Միգել Արրարասը։
Հայաստանի տարբեր մարզերում երեք տարի իսպանացիները չափում էին քամու ուժգնությունը։ Վերջապես, իսպանական առագաստները հանգրվանեցին Վարսեր գյուղի մոտ, Սևանա լճից և Սևան քաղաքից քիչ հեռու։ Այստեղ ընկերությունը մտածում է 200 ՄգՎտ հզորությամբ էլեկրտրակայան կառուցել։
Նշենք, որ Հայաստանում դեռ խոշոր հողմաէլեկտրակայաններ չկան։ Իսկ երկրի ողջ էներգահամակարգում արևային և հողմային հզորություններն այժմ 1%–ից պակաս են զբաղեցնում։
«Այստեղ չափումներ ենք իրականացնում արդեն շուրջ մեկ տարի։ Քամու ուժգնությունը բավարար է։ Էներգետիկ ռեսուրսը թող որ մեծ չէ, բայց կա։ Այժմ կարևոր հարցն այն է, թե որքանով պետությունը կհամաձայնի մեզանից էլեկտրաէներգիա գնել։ Նախկինում սակագներն ավելի բարձր էին, այժմ ուզում են մինչև 5-6 ցենտ առաջարկել», – ասաց Արրարասը։
Իսկ որքա՞ն է հարկավոր, որպեսզի այստեղ սկսեն պտտվել հողմային գեներատորը։ Դա հասկանալու համար, պետք է ամփոփել չափումների արդյունքները, երբ տարին ավարտվի։ Այդ ժամանակ հնարավոր կլինի տեսնել, թե ինչ ուժգնությամբ և ամսվա որ օրերին է այստեղ ուժեղ քամի փչում (թե ինչպիսի քամիների վարդ կա այստեղ)։
«Ամեն ինչ կախված է նաև նրանից, թե ինչ ներդրումներ կկարողանանք ներգրավել։ Մեզ օգնում են արտահանմանն աջակցող Իսպանիայի պետական կազմակերպությունները։ Հույս ունենք ներդրումներ ստանալ նաև միջազգային կազմակերպություններից. IFC և EBRD։ Դեռ չգիտենք, թե ինչ պայմաններ մեզ կառաջարկեն։ Սակայն Հայաստանի իշխանությունները մեկ առավելություն են տալիս։ Ինչ սակագին էլ լինի, մեզ կառաջարկեն այն 20 տարով։ Այսինքն մենք կիմանանք, թե ինչ շահույթ ակնկալենք։ Հուսով եմ, ընդհանուր մոտեցումներ կգտնենք», – նկատեց Արրարասը։
Acciona ընկերությունը աշխարհի տարբեր երկրներում տեղակայված 7,5 գիգավատ ընդհանուր հզորության վերականգնվող էներգետիկայի էլեկտրակայաններ ունի։
200 ՄգՎտ հզորությամբ Հայաստանի նախագիծը, ընկերության խոշոր նախագծերից մեկը կդառնա։ Համեմատության համար, Օահակա (Մեքսիկայի հարավ) հողմակայանը 306 ՄգՎտ հզորություն ունի։ Acciona-ն (գերմանական Nordex ընկերության հետ) հողմային գեներատորների խոշոր արտադրողների տասնյակում է։
Իր նախագիծն ընկերությունը ներկայացրել է Energy Week Armenia 2018 վերականգնվող էներգետիկայի գիտաժողովին, որը կազմակերպել էր Հայաստանի վերականգնվող էներգետիկայի հիմնադրամը։
