ԵՐԵՎԱՆ, 20 նոյեմբերի — Sputnik. Վարչապետի պաշտոնակատարն անձամբ չի միջամտի ՀՀ երրորդ նախագահ Սերժ Սարգսյանի եղբոր` Ալեքսանդր Սարգսյանի գործին։ Այս մասին այսօր մամուլի ասուլիսի ժամանակ ասաց ՀՀ վարչապետի պաշտոնակատար Նիկոլ Փաշինյանը։
Նրա խոսքով` քննիչները բավական պրոֆեսիոնալ են կատարում իրենց աշխատանքը, իսկ գործի ելքը կորոշի քննությունն ու դատարանը։
«Վերջերս լուրեր են տարածվում, որ այս կամ այն մարդու ճակատագիրը որոշվում է վերևից եկած հրահանգով։ Նման բան չի կարող լինել։ Պետք չէ ինձ վերածել քննիչի, դատախազի ու պետանվտանգության ղեկավարի», – ասաց Փաշինյանը։
Հիշեցնենք` մի քանի ամիս առաջ Անվտանգության ազգային ծառայությունը խուզարկություն էր անցկացրել Երևանի կենտրոնում գտնվող Ալեքսանդր (Սաշիկ) Սարգսյանի առանձնատանը։ Ալեքսանդր Սարգսյանին ոստիկանություն էին տարել, իսկ հետո ազատ են արձակել։ Նրա դեմ գործ է հարուցվել ապօրինի զենք պահելու հոդվածով։
