ԵՐԵՎԱՆ, 7 սեպտեմբերի — Sputnik. Երևանի ընդհանուր իրավասության դատարանում դատավոր Աննա Դանիբեկյանի նախագահությամբ այսօր քննվեց Սերժ Սարգսյանի եղբորորդու` Հայկ Ալեքսանդրի Սարգսյանի նկատմամբ ընտրված խափանման միջոց կալանավորումը վերացնելու, փոփոխելու կամ այն անփոփոխ թողնելու հարցը։
Նիստն անցկացվեց դռնբաց և հրապարակային, քանի որ խափանման միջոցի ընտրության դատական նիստերը գաղտնի անցկացնելու կարգը համարվել է հակասահմանադրական և փոխվել։
Սպանության փորձի և ապօրինի զենք-զինամթերք պահելու մեջ մեղադրվող Հայկ Սարգսյանի պաշտպան Երեմ Սարգսյանը հայտարարեց, որ հարուցված քրեական գործի հիմքում ապացույցներ չկան, և վերահսկող դատախազը դեռ նախաքննության փուլում պետք է հրաժարվեր մեղադրանքից։
«2007թ–ին հարուցված քրեական գործի նյութերը ոչնչացված են, և հնարավոր չէ պարզել, արդյոք տուժողի դիմումում նշված հանգամանքները, որի հիման վրա վերաբացվել է գործը, նոր հանգամանքներ են, թե ոչ»,– ասաց նա` հավելելով, որ եթե գործը չկա, պետք է գուշակությամբ պարզել՝ կա՞ն արդյոք նոր երեւան եկած հանգամանքներ, թե՝ ոչ։
Դատավոր Աննա Դանիբեկյանը հիշեցրեց, որ դատարանում այսօր նախնական կալանքի հարցն է քննարկվում, իսկ բուն գործով դատական նիստը նշանակված է սեպտեմբերի 17-ին։
Այսպիսով՝ դատավոր Աննա Դանիբեկյանը հեռացավ խորհրդակցական սենյակ՝ Հայկ Սարգսյանի խափանման միջոցի վերաբերյալ որոշում կայացնելու։ Իսկ որոշումը կհրապարակվի սեպտեմբերի 10-ին:
Հիշեցնենք, Հայկ Սարգսյանին մեղադրանք է առաջադրվել 2007թ–ին կատարված սպանության փորձի համար։
2007 թ–ի ապրիլի 1-ին երեկոյան, Երևանի Թումանյան-Նալբանդյան փողոցների խաչմերուկում, Ալեքսանդր Սարգսյանի տան մոտ հնչած կրակոցից ստացած վնասվածքով հիվանդանոց էր տեղափոխվել Երևանի բնակիչ, 25–ամյա Դավիթ Սիմոնյանը։
Նույն օրը ոստիկանություն է ներկայացել նրա ընկեր Արթուր Ղևոնդյանը, ներկայացրել ատրճանակը, որից արձակվել էր կրակոցն ու հայտնել, որ այն գտել է մանկապարտեզի մոտից և անզգուշությամբ կրակել ընկերոջ վրա։
Այս փաստով հարուցված քրեական գործը որոշ ժամանակ անց կարճվել էր` տուժողի հետ հաշտվելու հիմքով, քանի որ Դավիթ Սիմոնյանը բողոք չէր ներկայացրել։
11 տարի անց` 2018 թ–ի հունիսի 29-ին Դ. Սիմոնյանը դիմում է ներկայացրել դատախազություն՝ նշելով, որ իրեն կրակել և մարմնական վնասվածքը պատճառել էր ոչ թե Ղևոնդյանը, այլ Հայկ Սարգսյանը՝ իրենց տան առաջին հարկում գտնվող թիկնազորի համար նախատեսված սենյակում։
Իսկ ընկերը կեղծ ցուցմունք էր տվել, քանի որ Սարգսյանները սպառնացել էին, որ հակառակ դեպքում երկար չի ապրի։
11 տարի առաջ կարճված քրեական գործը նոր հանգամանքների ի հայտ գալուց հետո վերաբացվել է։ Նախաքննությունը շարունակվում է։
