ԵՐԵՎԱՆ, 2 նոյեմբերի — Sputnik. Հայ զինվորականներին Սիրիա ուղարկելու համար կապահովվեն բոլոր իրավական հիմնավորումները։ Այդ մասին Հայաստանի խորհրդարանում հայտարարեց ԱԳՆ ղեկավարի պաշտոնակատար Զոհրաբ Մնացականյանը։
Հայաստանը շարունակում է մարդասիրական աջակցություն ցուցաբերել ոչ միայն սիրիահայերին, այլ նաև Սիրիայի ժողովրդին, նշեց նա։
«Սակրավորների և բժիշկների մարդասիրական առաքելություն ուղարկելը շատ կարևոր գործընթաց է մեզ համար։ Այդ գործընթացի շուրջ քննարկումներ ենք վարում տարբեր գործընկերների հետ։ Որովհետև մեզ համար չափազանց կարևոր է ապահովել այդ գործընթացի համար բոլոր իրավական շրջանակները», – նշեց Մնացականյանը։
Հիշեցնենք, որ հայ զինծառայողների մարդասիրական համակազմը Սիրիա ուղարկելու մասին պայմանավորվածությունը ձեռք է բերվել Հայաստանի վարչապետ Նիկոլ Փաշինյանի և ՌԴ նախագահ Վլադիմիր Պուտինի` սեպտեմբերին կայացած հանդիպման ժամանակ։
