ԵՐԵՎԱՆ, 2 նոյեմբերի – Sputnik. ՀԱՊԿ նոր գլխավոր քարտուղարի նշանակման հարցը շարունակվում է քննարկվել։
Այս մասին Sputnik Արմենիային ասաց ՀՀ արտգործնախարարի մամուլի քարտուղար Աննա Նաղդալյանը` պատասխանելով` արդյոք Յուրի Խաչատուրովին այդ պաշտոնում կփոխարինի Հայաստանի ներկայացուցիչը։
Ավելի վաղ այսօր Հավաքական անվտանգության պայմանագրի կազմակերպության խորհրդի որոշմամբ Յուրի Խաչատուրովն ազատվեց ՀԱՊԿ գլխավոր քարտուղարի պաշտոնից։
«Դրա վերաբերյալ խորհրդատվություններ են ընթանում», – ասաց Նաղդալյանը։
Նշենք` ավելի վաղ հայկական մամուլում, որպես հավանական թեկնածուի, հիշատակում էին ՀՀ պաշտպանության նախկին նախարար Վաղարշակ Հարությունյանին։ Սակայն ինքը՝ Հարությունյանը հրաժարվեց մեկնաբանել այդ տեղեկությունը։
Հիշեցնենք` Խաչատուրովին մեղադրանք է առաջադրվել 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործով, այն բանի համար, որ նա այլ անձանց հետ նախնական համաձայնությամբ տապալել է ՀՀ սահմանադրական կարգը:
Հուլիսի 28-ին Երևանի ընդհանուր իրավասության դատարանի դատավոր Դավիթ Բալայանը Յուրի Խաչատուրովի նկատմամբ կալանավորումը որպես խափանման միջոց ընտրելու միջնորդության քննության արդյունքում նախ որոշել էր բավարարել միջնորդությունը, ապա մեղադրյալի նկատմամբ այլընտրանքային խափանման միջոց` գրավ կիրառելու որոշում կայացրել:
Գրավի չափ էր սահմանվել 5 մլն դրամը, ինչը վճարելուց հետո Խաչատուրովն ազատվել էր արգելանքից:
