ԵՐԵՎԱՆ, 23 հոկտեմբերի — Sputnik. Արևմուտքի առաջատար երկրների բնակիչների մոտավորապես կեսից ավելին չի հավատում Ռուսաստանի նկատմամբ իրենց ԶԼՄ-ների օբյեկտիվությանը։ Այդ մասին վկայում են Sputnik.Կարծիք հասարակական կարծիքի հարցման տվյալները։
Հարցախույզի համաձայն, որն իրականացվել է Sputnik տեղեկատվական գործակալության և ռադիոյի պատվերով 2018թ-ի օգոստոսի 9-20-ը, ֆրանսիացիների 53 տոկոսը, գերմանացիների 50 տոկոսը, բրիտանացիների 47 տոկոսը և ամերիկացիների 43 տոկոսը կարծում են, որ իրենց երկրների ԶԼՄ-ները ստեղծում են Ռուսաստանի ոչ օբյեկտիվ պատկերը։ «Ռուսական հարցում» իրենց լրատվամիջոցներին վստահում է Ֆրանսիայի բնակիչների 25 տոկոսը, Մեծ Բրիտանիայի բնակիչների 33 տոկոսը, ԳԴՀ-ի և ԱՄՆ-ի բնակիչների 39-ական տոկոսը։
Հետաքրքիր է, որ երիտասարդ գերմանացիները և ֆրանսիացիներն ավագ սերնդի ներկայացուցիչներից ավելի հաճախ են ոչ հավաստի համարում ԶԼՄ-ների տեղեկությունները Ռուսաստանի մասին. Ֆրանսիայում այդպես են կարծում 35 տարեկանից ցածր հարցվածների 28 տոկոսը` 35 տարեկանից բարձր հարցվածների 51 տոկոսի դիմաց, Գերմանիայում, համապատասխանաբար, 54 տոկոսը` 48 տոկոսի դիմաց։ ԱՄՆ-ում և Մեծ Բրիտանիայում, հակառակը, ավագ սերունդը երիտասարդ սերնդից ավելի հաճախ է խոսում Ռուսաստանի մասին ԶԼՄ-ների տվյալների ոչ օբյեկտիվության մասին. 35 տարեկանից բարձր ամերիկացիների 46 տոկոսն այդ տարիքից ցածր հարցվածների 34 տոկոսի դիմաց, ավագ սերնդի բրիտանացիների 51 տոկոսը երիտասարդների 38 տոկոսի դիմաց։
Հարցումն անցկացրել է օգոստոսի 9-20-ը IFop ֆրանսիական ընկերությունը։ Հարցախույզին մասնակցել են 18 տարեկանից բարձր 4033 մարդ։ Ընտրանքն իրականացվել է ըստ հարցվածների սեռի, տարիքի և բնակության վայրի։ Տվյալների անճշտության առավելագույն մակարդակը կազմում է +/-3,1 տոկոս` 95 տոկոս վստահության հավանականությամբ:
Հասարակական կարծիքի ուսումնասիրման միջազգային նախագիծը մեկնարկել է 2015 թվականի հունվարին։ Գործընկերն են Populus, Ifop և Forsa հայտնի հետազոտական ընկերությունները: Sputnik.Կարծիք նախագծի շրջանակում կանոնավոր կերպով հասարակական կարծիքի ուսումնասիրություններ են անցկացվում Եվրոպայի և ԱՄՆ-ի երկրներում առավել արդի սոցիալական և քաղաքական թեմաների վերաբերյալ։
