ԵՐԵՎԱՆ, 27 սեպտեմբերի — Sputnik. Սեպտեմբերի 28-ին Երևանի փողոցներ դուրս կգան աչքերը կապած, սպիտակ ձեռնափայտով և անվասայլակներով մարդիկ, հասկանալու համար, թե ինչպես են ապրում հաշմանդամություն ունեցողները։
Sputnik Արմենիայի թղթակցին այս մասին ասաց «Սպիտակ ձեռնափայտ» ՀԿ նախագահ Օլեգ Կոլպաշչիկովը։
Հայաստանում սեպտեմբերի 23-ից մեկնարկել են Ինկլյուզիայի օրերը։ 10 օրվա ընթացքում մի շարք միջոցառումներ են նախատեսված, որոնք նպատակ ունեն արդիականացնել ժամանակակից հասարակության մեջ ներառական փոխգործակցության զարգացման հարցերը։ «Փակիր աչքերդ, որ տեսնես» խորագրով քննարկում կանցկացվի, որի մասնակիցների աչքերը կկապեն։
«Երբ մարդու աչքերը փակում են, զարգանում է երևակայությունն ու ֆանտազիան։ Մարդիկ մենակ կմնան, կզգան իրականությունն ու մի շարք հետաքրքիր բան կտեսնեն», – ընդգծեց նա։
Կազմակերպության ղեկավարը պատմեց, որ իր կյանքի առաջին 20 տարվա ընթացքում չէր տեսնում, վերջին 25-ի ժամանակ լրիվ կույր էր, սակայն այժմ նա իրեն իրականությանն ավելի մոտ է համարում։ Նա հիշեցրեց նկարիչ Բորիս Խոխոնովի խոսքերն այն մասին, որ աչքերը մարդկանց խաբելու համար են։
Ինկլյուզիայի օրերին մասնակցելու համար Հայաստան ժամանած շվեդ ուսուցիչ Յոհանես Մարսելն իր հերթին նշեց, որ Հայաստանում մարդիկ փորձում են օգնել և հոգ են տանում հաշմանդամ մարդկանց մասին։ Եվ անում են դա ինքնաբուխ և ի սրտե։
«Մեզ մոտ ամեն ինչը շատ երկար և մանրակրկին կազմակերպվում է, իսկ այստեղ ինքնաբերաբար է լինում, ինչը շատ է դուր գալիս», – նշեց Մարսելը։
Նա ասա, որ Շվեդիայում կառավարությունն աջակցում է հաշմանդամություն ունեցող մարդկանց։ Նրանք կարող են առանձին բնակարան և ժամանց ունենալ, ինչի համար իրենք են վճարում։
«Հիմնականում հաշմանդամները իրենց բնակարաններում են ապրում։ Մենակ ապրելը լավ է հնչում, սակայն միայնակ լինելը` ահավոր է», – ասաց նա։
Նշենք, որ Սևանա լճում գործող Armenian Camp առագաստանավային կենտրոնը Ինկլյուզիայի օրերի հիմնական բազան դարձավ։ Այստեղ են անցկացվում «Ոգու Առագաստներ»–ով շուրջերկրյա ճանապարհորդության մարզական միջոցառումները հաշմանդամություն ունեցող մարդկանց մասնակցությամբ։ Ճամբարի աշխատանքներին մասնակցելու համար ժամանել են հաշմանդամներ Հայաստանից, Ռուսաստանից, Լատվիայից և Շվեդիայից։ Ճամբարի մասնակիցները կսովորեն առագաստանավ, կայակ վարել և վարժվել ֆրիդայֆինգի հմտություններին։
